Gürcüstanda bəzi sabiq dövlət məmurlarının evlərində axtarış aparılıb
Tbilisi,17 oktyabr, AZƏRTAC
Gürcüstanın sabiq Baş naziri İrakli Qaribaşvili, Dövlət Təhlükəsizlik Xidmətinin keçmiş rəhbəri Qriqol Liluaşvili, sabiq Baş prokuror Otar Partsxaladze və onlarla əlaqəli 8 şəxsin evlərində axtarış aparılıb.
AZƏRTAC xəbər verir ki, bu barədə Gürcüstanın Baş prokuroru Giorgi Qvarakidze keçirdiyi brifinqdə məlumat verib.
Onun sözlərinə görə, axtarışlar nəticəsində müxtəlif elektron cihazlar, sənədlər və külli miqdarda nağd pul götürülüb.
“Cinayət işlərinin ictimai əhəmiyyəti və marağı nəzərə alınaraq ictimaiyyətə məlumat vermək istərdim ki, Gürcüstan Baş Prokurorluğunun İstintaq Bölməsində, Dövlət Təhlükəsizlik Xidmətinin Korrupsiyaya Qarşı Mübarizə və Dövlət Təhlükəsizliyi Departamentlərində aparılan bir neçə istintaq çərçivəsində bu gün saat 10:20-də genişmiqyaslı əməliyyat keçirilib. Əməliyyat zamanı sabiq Baş nazir İrakli Qaribaşvili, keçmiş Baş prokuror Otar Partsxaladze və onlarla əlaqəli olan 8 nəfərin mənzillərində və şəxsi obyektlərində axtarış aparılıb, külli miqdarda pul vəsaiti götürülüb” – deyə o vurğulayıb.
Baş prokuror əlavə edib ki, araşdırmalar hazırda fəal şəkildə davam etdirilir və istintaqın gedişi barədə ictimaiyyət mütəmadi məlumatlandırılacaq.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
