QAN YADDAŞI
GÜRCÜSTANIN BORÇALI BÖLGƏSİNDƏ 20 YANVAR VƏ 9 APREL ŞƏHİDLƏRİNİN XATİRƏLƏRİ YAD EDİLMİŞDİR
Tbilisi, 19 yanvar (AZƏRTAC). Yanvarın 18-də Gürcüstanın Reinteqrasiya Məsələləri üzrə Nazirliyi və Kvemo Kartli-Borçalı bölgəsi qubernatorluğunun təşəbbüsü ilə Marneuli rayon mərkəzindəki Nəriman Nərimanov adına mədəniyyət sarayında 20 Yanvar Bakı, 9 aprel Tbilisi şəhidlərinin xatirələrinə həsr olunmuş tədbir keçirilmişdir.
Əvvəlcə 20 Yanvar və 9 Aprel hadisələrini əks etdirən filmlər nümayiş olunmuşdur.
Kvemo Kartli-Borçalı bölgəsinin qubernatoru David Kirkitadze sovet imperiyasının özünü saxlamaq məqsədi ilə törətdiyi ədalətsizlikləri diqqətə çatdırmış, 1989-cu il aprelin 9-da Tbilisidə, 1990-cı il yanvarın 20-də Bakıda qanlı qətliamlar törədərək azadlıqsevər gürcü və Azərbaycan xalqlarının iradəsini qırmaq cəhdinin puça çıxdığını vurğulamışdır. Bildirilmişdir ki, şəhidlərin qanı yerdə qalmamış və hər iki ölkənin xalqları müstəqillik qazanaraq dünyanın sivil ölkələri arasında layiqli yerlərini tutmuşlar.
Qubernator qeyd etmişdir ki, imperiyanın haqsızlığı bu iki dost xalqı daha da birləşdirmiş, tarixin dərinliklərindən gələn qardaşlıq ənənələrini möhkəmləndirmişdir.
Azərbaycanın Gürcüstandakı səfiri Namiq Əliyev toplantı iştirakçılarına 20 il əvvəl Bakıda vətəninin müstəqilliyi və azadlığı tələbi ilə nümayişə çıxmış dinc əhaliyə qarşı dişinədək silahlanmış sovet ordusunun yeridilməsi, yüzlərlə günahsız insanın qanına qəltan edilməsi barədə ətraflı məlumat vermişdir.
Səfir qeyd etmişdir ki, Azərbaycan torplaqlarına göz dikmiş ermənilərin hiyləsi ilə törədilmiş bu vəhşiliyə dünya göz yummağa çalışsa da, ulu öndər Heydər Əliyev Moskvada öz həyatını təhlükə qarşısında qoyaraq baş verənləri beynəlxalq ictimaiyyətin diqqətinə çatdırmış, yenidən hakimiyyətə qayıdışı ilə isə səriştəsiz rəhbərlik üzündən dağılıb parçalanmaq təhlükəsi qarşısında qalan Azərbaycanı böyük təhlükələrdən qurtarmış, ölkənin müstəqilliyini əbədi etmişdir.
Diplomat demişdir ki, ümummilli liderimizin Azərbaycanın haqq işinin dünyaya çatdırılması, ərazi bütövlüyünün təmin edilməsi, ölkənin müstəqilliyinin qorunub saxlanılması, dövlətçiliyin möhkəmləndirilməsi, demokratiyanın inkişafı və s. sahələrdə gələcəyə istiqamətlənmiş siyasətinin Prezident İlham Əliyev tərəfindən uğurla davam etdirilməsi, diplomatiyamızın getdikcə artan uğurları məmnunluq doğurur.
Reinteqrasiya məsələləri üzrə Gürcüstanın dövlət naziri Temur Yakobaşvili sovet imperiyasının bu iki qonşu ölkədə törətdiyi ədalətsizliklərin onun özünün dağılmasına gətirib çıxardığını demişdir.
Çıxışlarda sovet imperiyasının Tbilisi və Bakıda törətdiyi qanlı faciələr pislənmiş, Azərbaycanın və Gürcüstanın haqq işinin mütləq qalib gələcəyinə, tezliklə hər iki ölkənin ərazi bütövlüyünün bərpa ediləcəyinə əminlik ifadə olunmuşdur.
Sonda Heydər Əliyev adına Tbilisi Azərbaycan Dövlət Dram Teatrının kollektivi hər iki faciəyə həsr olunmuş bədii kompozisiya səsləndirmişdir.
Tədbirdə Kvemo Kartli-Borçalı bölgəsinə daxil olan rayonların rəhbərləri, Borçalı ictimaiyyətinin nümayəndələri iştirak etmişlər.