“Hamburq” klubunun Bundesliqaya yüksəlişi münasibətilə keçirilən şəhər bayramında 100 min nəfər iştirak edib
Berlin, 19 may, AZƏRTAC
“Hamburq” futbol komandasının yeddiillik fasilədən sonra yenidən Bundesliqaya vəsiqə qazanması münasibətilə şəhərdə keçirilən bayram tədbirində 100 minə yaxın insan iştirak edib.
AZƏRTAC yerli mediaya istinadla xəbər verir ki, şəhərin bələdiyyə binasının qarşısındakı meydanda keçirilən bayram tədbirinə qatılanlar komandanın üzvlərini və baş məşqçi Merlin Poltsini böyük coşqu ilə alqışlayıblar.
Komandanın uğurunu qeyd etmək üçün şəhər meriyasında rəsmi qəbul təşkil olunub. Hamburqun meri Peter Tşenşer komandanın layiq olduğu yerə - Bundesliqaya yeddiillik fasilədən sonra yüksəlişi münasibətilə klubun üzvlərini və azarkeşləri təbrik edib. O, “Hamburq”un həm kişilərdən, həm də qadınlardan ibarət komandasının eyni mövsümdə Bundesliqaya yüksəlməsini tarixi hadisə adlandırıb.
Baş məşqçi Merlin Poltsin isə deyib: “Bundesliqa, indi səni yeddi il əvvəl vida etdiyin “Hamburq” deyil, daha güclü bir komanda gözləyir”.
Şəhər bayramında futbolçular və məşqçilər azarkeşləri meriya binasının eyvanından salamlayıblar. Sonra qələbə paradı olub, klubun həm kişilər, həm də qadınlar komandasının üzvləri xüsusi avtomobillərlə şəhərin mərkəzi küçələri ilə keçərək azarkeşləri salamlayıblar.
Xatırladaq ki, Almaniya çempionatının ikinci liqasında 59 xal toplayan “Hamburq” klubu “Köln”dən sonra Bundesliqanın 2025-2026-cı il mövsümündə iştirak hüququ qazanıb.
Bölmənin digər xəbərləri
