HAVA ŞƏRAİTİNİN PİSLƏŞMƏSİ İLƏ ƏLAQƏDAR SÜRÜCÜLƏR EHTİYATLI OLMALIDIRLAR
Texniki cəhətdən nasaz olan, əsasən şinlərinin zehləri yeyilmiş avtomobillərin sürücülərindən, eləcə də təcrübəsi az olan sürücülərdən xahiş olunur ki, qarlı-çovğunlu günlərdə nəqliyyat vasitələrindən mümkün qədər istifadə etməsinlər.
Buzlu yolda hərəkət edərkən aşağıda göstərilən təhlükəsizlik tədbirlərinə xüsusilə diqqət yetirilməlidir:
- yola çıxmazdan əvvəl avtomobilin əyləc və sükan sistemlərini, təkərlərin vəziyyətini yoxlayın. Zərurət varsa əyləc sistemi tənzimlənməlidir, bütün təkərlərin əyləcinin eyni səmərə ilə işləməsi xüsusilə vacibdir. Əgər avtomobilinizin zəif əyləci, təkərlərin protektorları yeyilibsə, normadan artıq sükan boşluğu varsa, sürüşmə ehtimalı dəfələrlə artır;
- hərəkət sürətini, digər avtomobillərlə ara məsafəsini yol örtüyündən və hava şəraitindən asılı olaraq düzgün seçin;
- eniş-yoxuşlarda xüsusilə diqqətli olmaq və çalışmaq lazımdır ki, təkərlər yerində fırlanmasın. Zərurət yarandıqda dərhal sürətlər qutusunun aşağı ötürməsinə keçmək, sürəti mühərrik vasitəsilə azaltmaq belə halda çox səmərəlidir;
- Buzlu, sürüşkən yolda heç vaxt neytral ötürmədə getməyin və bu zaman əyləci basmayın;
Avtomobil sürüşərkən əyləci basmayın. Çünki təkərlərin bağlanması idarəetmənin tam itirilməsi deməkdir. Sürüşmə zamanı dərhal ayağı qaz əyləcindən çəkmək və sükanı avtomobilin sürüşdüyü tərəfə döndərmək lazımdır.
Respublikanın bir sıra ərazilərində avtomobil yollarının buz bağlaması ilə əlaqədar olaraq, səfərlərin müvəqqəti təxirə salınması tövsiyə olunur.
