Helsinkidə Nəsiminin 650 illiyinə həsr olunmuş konfrans təşkil edilib
Stokholm, 29 aprel, Rauf Əliyev, AZƏRTAC
Helsinkidə böyük Azərbaycan mütəfəkkiri İmadəddin Nəsiminin 650 illiyinə həsr olunmuş ədəbi-bədii konfrans keçirilib.
AZƏRTAC xəbər verir ki, tədbir Finlandiya Təhsil İşçilərinin Həmkarlar İttifaqı ilə müqavilə əsasında, Finlandiyada fəaliyyət göstərən diaspor təşkilatlarının birgə layihəsi çərçivəsində Finlandiya Azərbaycan Assosiasiyasının sədri Vasif Muradlının təşəbbüsü və dəstəyi, Azərbaycanlı Qadınlar Cəmiyyətinin, Finlandiya Azərbaycan Gənclər Birliyinin birgə təşkilatçılığı reallaşıb.
Konfransda Finlandiya Xarici İşlər Nazirliyinin Qafqaz ölkələri üzrə rəsmi nümayəndəsi Max Hatvala, Helsinki Təhsil İdarəsinin rəsmi nümayəndəsi Laurisalo Niina, Təhsil İşçiləri Həmkarlar İttifaqının rəsmisi Tiina İsaksson, Finlandiya Əmək və Sosial Nazirliyinin əməkdaşı Puroaho Petri rəsmi qonaqlar qismində iştirak ediblər.
Dövlət himnimizin səsləndirilməsi ilə başlayan konfransda əvvəlcə Azərbaycanlı Qadınlar Cəmiyyətinin sədri Arzu Oqtay çıxış edərək İmadəddin Nəsiminin həyat və yaradıcılığı haqqında geniş məlumat verib. Bildirib ki, Finlandiyada Avropa Ədəbi Tərcüməçilər İttifaqının (SİETL) üzvü Tahirə Cəfərovanın təşəbbüsü və redaktorluğu ilə “Gövhəri laməkan mənəm” adlı Azərbaycan poeziya antologiyası fin dilinə tərcümə olunaraq çap edilib. “Antologiyada Əfzələddin Xaqanidən dövrümüzə qədər Azərbaycan şairlərinin yaradıcılığı əksini tapıb. Topluya daxil edilən poetik əsərləri Finlandiyanın ən tanınmış şairləri - “Finlandiya” mükafatı laureatı Xannu Myakelya, tanınmış şair və naşir, Ömər Xəyyamın və Ceyms Coysun əsərlərinin tərcüməçisi kimi tanınan Leyevu Lehto, şair, tərcüməçi və ictimai xadim Yukka Malnilen, yazıçı, şair və ədəbiyyatşünas Timo Malmi və Tahirə Cəfərova tərcümə ediblər”, - deyə cəmiyyətin sədri qeyd edib.
Antologiyaya 27 şairin, o cümlədən Xaqani, Nizami, Nəsimi, Füzuli, Natəvan və Sabir kimi klassiklərin şeirləri, sovet repressiyasının qurbanları Hüseyn Cavid və Mikayıl Müşfiq, XX əsrin böyük Azərbaycan şairləri Səməd Vurğun, Süleyman Rüstəm, Rəsul Rza, Bəxtiyar Vahabzadə və Nigar Rəfibəylinin əsərlərinin daxil edildiyini vurğulayıb.
Arzu Oqtay kitabda müasir Azərbaycan poeziyasının nümayəndələri Vaqif Səmədoğlu, Fikrət Qoca, Ramiz Rövşən, Zəlimxan Yaqub və başqalarının şeirlərinin də yer aldığını söyləyib.
Sonra Finlandiya Xarici İşlər Nazirliyinin Qafqaz ölkələri üzrə rəsmi nümayəndəsi Max Hatvala çıxış edərək ölkəsinin Azərbaycanla əlaqələrinin sıx və qədim tarixə söykəndiyini diqqətə çatdırıb. Diplomat fin iş adamlarının Azərbaycanda hər iki ölkə üçün faydalı olan birgə layihələr üzrə çalışdıqlarını qeyd edərək Nobel qardaşlarının Azərbaycanda fəaliyyətləri zamanı finlərin də onlarla birgə çalışdığını yada salıb.
Bildirib ki, artıq Finlandiya dövləti Nobel qardaşlarının fəaliyyəti və uğurları haqqında daha çox məlumat toplamaq və tədqiqatlar aparmaq üçün Azərbaycan dövlətinə müraciət edib. Bir ay əvvəl Azərbaycanda olduğunu xatırladan diplomat ölkəmizlə bağlı xoş təəssüratlarını bölüşüb.
Helsinki Təhsil İdarəsinin nümayəndəsi Laurisalo Niina tədbirdə Nəsimi haqqında eşitdikləri və sərgidə gördüklərindən təsirləndiyini bildirərək qeyd edib ki, hər iki ölkə arasında digər sahələrdə olduğu kimi təhsil sahəsində də sıx əlaqələr mövcuddur.
Təhsil İşçiləri Həmkarlar İttifaqının rəsmisi Tiina İsaksson çıxışında konfransı yüksək qiymətləndirib və azərbaycanlıların fin cəmiyyətinə inteqrasiyasının yüksək olduğunu vurğulayıb.
Sonra Finlandiya Azərbaycan Gənclər Birliyi Təşkilatının sədri Nəzrin Məcidli və sədr müavinı Ayla Zülfi qonaqları salamlayaraq təşkilatları haqqında geniş məlumat veriblər.
Tədbirdə İmaməddin Nəsimidən bəhs edən təqdimat nümayiş olunub.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
