Fevralın 3-də Azərbaycan Respublikasının Prezidenti Heydər Əliyev Türkiyənin müxtəlif kütləvi informasiya vasitələrini təmsil edən jurnalistlərin bir qrupunu onların xahişi ilə qəbul etmişdir.

Türkiyənin respublikamızdakı səfirliyinin mətbuat müşaviri Turqut Ər qəbula görə jurnalistlər adından Azərbaycan rəhbərinə təşəkkür edərək “Hüriyyət”, “Milliyyət”, “Günaydın”, “Türkiyə”, “Zaman” qəzetləri, Anadolu və Azərbaycan - Türk agentlikləri, habelə TRT və Kanal-6 televiziya şirkətləri nümayəndələrinin Azərbaycanda indiki vəziyyət barəsində və respublika Prezidenti Heydər Əliyevin Türkiyəyə qarşıdakı səfəri ilə əlaqədar onunla müsahibə aparmaq arzusunda olduqlarını bildirdi. T.Ər dedi: Azərbaycan Prezidentinin Ankaraya rəsmi səfəri Türkiyədə böyük maraq doğurur və bütün türk xalqı bu səfəri səbirsizliklə gözləyir.

Heydər Əliyev dost ölkə jurnalistlərini maraqlandıran suallara cavab verməyə hazır olduğunu bildirərək, Türkiyəyə qarşıdakı səfəri ilə bağlı onlarla Ankarada daha ətraflı söhbət edəcəyini söylədi.

Dövlət başçısı Azərbaycan və türk xalqları arasında bütün sahələrdə əlaqələrin həmişə xoşməramlı olduğunu xatırladı və Türkiyənin bizim üçün dost və qardaş ölkə olduğunu dedi. Azərbaycan dövlətinin rəhbəri indiki şəraitdə ölkələrimiz arasında əməkdaşlığı genişləndirmək üçün böyük imkanlar olduğunu söyləyərək, hər iki ölkə rəhbərlərinin bu imkanlardan lazımi səviyyədə istifadə etməsinin zəruriliyindən danışdı.

Ankaraya Türkiyə Prezidenti Süleyman Dəmirəlin dəvəti ilə gedəcəyini söyləyən Heydər Əliyev bildirdi ki, səfər zamanı Türkiyənin dövlət və hökumət rəhbərləri, iş adamları və ölkə ictimaiyyətinin nümayəndələri ilə onun görüşləri nəzərdə tutulmuşdur. Səfərin təxmini proqramı müəyyənləşdirilmişdir. Azərbaycan tərəfi ümid edir ki, qarşıdakı səfər iki ölkə arasında əməkdaşlığın yeni mərhələyə daxil olmasına təkan verəcəkdir.

Azərbaycan Prezidenti respublikamızdakı hərbi-siyasi durumla bağlı suallara cavab verərək dedi: Ərazimizin içərilərinə doğru irəliləməyə uğursuz cəhdlər edən Ermənistan Silahlı Qüvvələrinin son hücum əməliyyatlarının qarşısının alınması və cəbhənin bir sıra bölgələrində düşmənə sarsıdıcı zərbələr vurularaq, onun indiyədək zəbt etdiyi yaşayış məntəqələrimizin bir qismindən qovulması möhkəmlənməkdə olan Azərbaycan ordusunun torpaqlarımızı qorumaq iqtidarında olduğuna əyani sübutdur. Xalqımızın qəhrəmanlıq tarixini türkiyəli qonaqlara xatırladan Heydər Əliyev qeyd etdi ki, öz haqqını tələb etmək və onu qorumağı bacarmaq Azərbaycan xalqının ən qiymətli keyfiyyətlərindəndir. Düşməni işğal etdiyi ərazilərimizdən qovmaq, sərhədlərimizin toxunulmazlığını təmin etmək üçün, ilk növbədə, xalqda inam hissi yaratmaq lazım idi. Prezident dedi ki, biz buna, habelə respublikamızda sabitlik yaranmasına, düşmən hücumunun qarşısının alınmasına və cəbhədə uğurlar qazanılmasına nail olmuşuq.

Heydər Əliyev dedi ki, Azərbaycan tərəfi müharibəyə sülh yolu ilə son qoyulması barədə dəfələrlə bəyan etdiyi mövqeyinə sadiqdir. Prezident bu yolda ilk addım kimi Ermənistan Silahlı Qüvvələrinin hələ də işğal altında qalan torpaqlarımızdan qeyd-şərtsiz çıxarılması və dərhal sülh danışıqlarına başlanması haqqında Azərbaycanın təklifini bir daha təkrar etdi. O, bu təklifin beynəlxalq hüquq normalarına da uyğun olduğunu vurğuladı.

Dövlət başçısı Azərbaycanda iqtidar-müxalifət münasibətləri, demokratik dövlət quruculuğu, insan hüquqlarının qorunması barədə və digər suallara da ətraflı cavablar verdi.

Azərbaycan Prezidenti Türkiyə jurnalistlərinə respublikamızın həyatının həqiqi mənzərəsini əks etdirməyi tövsiyə etdi və onların ölkəmizdə işləməsi üçün indən sonra da hər cür şərait yaradılacağını bildirdi.

Aslan Aslanov

AZƏRTAC-ın müxbiri