Hidrometeoroloji təhlükəsizliyin təmin edilməsi daim diqqət mərkəzində saxlanılır
Bakı, 15 noyabr, AZƏRTAC
Noyabrın 15-də Ulu Öndər Heydər Əliyevin 100 illik yubileyi münasibətilə Bakıda Türk Dünyası II Meteorologiya Forumu keçirilib.
Forum Ekologiya və Təbii Sərvətlər Nazirliyinin təşkilatçılığı, BMT-nin İnkişaf Proqramının dəstəyi ilə Azərbaycanda iqlim dəyişmələrinə milli uyğunlaşma Planının hazırlanması çərçivəsində təşkil olunub. Tədbirdə türkdilli ölkələrin ətraf mühit və iqlim dəyişmələri nazirləri, hidrometeorologiya xidmətlərinin rəhbər şəxsləri, dövlət qurumlarının nümayəndələri və ekspertlər iştirak ediblər. Forumun keçirilməsində məqsəd iqlim dəyişmələri sahəsində əlaqələndirilmiş fəaliyyətin aparılması, ekstremal hava şəraiti ilə bağlı erkən xəbərdarlıq sisteminin qurulması üzrə təcrübə mübadiləsinin genişləndirilməsi olub.
AZƏRTAC xəbər verir ki, forumda çıxış edən ekologiya və təbii sərvətlər naziri Muxtar Babayev Azərbaycanda hidrometeorologiya sahəsinin modernləşdirilməsi üçün dövlət investisiyaları çərçivəsində ən müasir müşahidə sistemlərinin tətbiq olunduğunu diqqətə çatdırıb: "Dopler radar sistemləri, dənizdə, quruda və çaylar üzərində müasir avtomat stansiyalar quraşdırılaraq istifadəyə verilir, əhalinin və iqtisadiyyatın hava-iqlim şəraitindən asılı olan sahələrinin hidrometeoroloji təhlükəsizliyinin təmin edilməsi daim diqqət mərkəzində saxlanılır. Hidrometeoroloji xidmətin müasir standartlar səviyyəsinə çatdırılması üçün beynəlxalq əməkdaşlıq əlaqələrinin genişləndirilməsinə xüsusi diqqət yetirilir. Azərbaycanda proqnozların keyfiyyətinin artırılması məqsədilə 20 ildən artıqdır ki, "TURKMETCAP" proqramı tətbiq edilir. Peyk məlumat mübadiləsi sistemi ilə informasiya mübadiləsi aparılır".
Nazir bildirib ki, şimal yarımkürəsinin müxtəlif regionlarında olduğu kimi ölkələrimiz də xüsusilə ekstremal hava və iqlim hadisələri daxil olmaqla təbii təhlükələrə məruz qalır. Həmin təsirləri mümkün dərəcədə azaltmaq üçün Ümumdünya Meteorologiya Təşkilatının “Hamı üçün erkən xəbərdarlıq” təşəbbüsünə uyğun olaraq effektiv əlaqələndirilmiş hazırlıq və cavab mexanizmlərinin yaradılması vacibdir. Ölkəmiz bu fəaliyyətdə regional əməkdaşlığa öz töhfəsini verməyə və ölkəmizdə tətbiq olunmuş müasir müşahidə sistemlərindən əldə olunan məlumatların bir platformada paylaşılmasına hazırdır.
Türkiyə Respublikasının ətraf mühit, şəhərsalma və iqlim dəyişmələri naziri Mehmet Özhaseki iqlim dəyişmələrinin yanğınların, quraqlıqların, sel hadisələrinin artması kimi fəsadlarla özünü göstərdiyini deyib. Onun sözlərinə görə, elmi araşdırmalara görə, son 150 ildə orta temperatur 1.1 dərəcə artıb. Əgər 2 dərəcə artım olarsa, planetdə qida çatışmazlığı, köçlər, müharibələr yaşana bilər. Temperaturun 3 dərəcə artması isə Yer kürəsinin yaşanılmaz hala gəlməsi deməkdir.
Nazir iqlim dəyişmələri ilə birgə mübarizənin daha səmərəli olacağını diqqətə çatdırıb.
Qazaxıstan Respublikasının ekologiya və təbii sərvətlər naziri Erlan Nısanbayev (onlayn), Özbəkistan Respublikasının ətraf mühitin mühafizəsi və iqlim dəyişikliyi naziri Aziz Abduhakimov (videomesaj), Azərbaycan Respublikası Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov, Azərbaycan Respublikası Nazirlər Kabinetinin Aqrar və ekologiya şöbəsinin müdiri Lətif Qasımov, BMT-nin İnkişaf Proqramının Azərbaycandakı rezident əlaqələndiricisi Alessandra Rokkasalvo (video-mesaj), İqlim Dəyişikliyi üzrə Hökumətlərarası Panelin sədri Jim Skea (video-mesaj) çıxış edərək meteoroloji müşahidələrdən alınan məlumatların iqlim dəyişmələrinin təsirləri ilə mübarizədə vacib rolunu qeyd edib, ölkələrin meteoroloji xidmətləri arasında müntəzəm bilik və məlumat mübadiləsinin qurulmasının, birgə səylərin vacibliyini vurğulayıblar.
Forum Türk dünyası ölkələrinin nümayəndələrinin təqdimatları ilə davam edib.
Forumda, həmçinin Türk Dünyası III Meteorologiya Forumunun Özbəkistanda keçirilməsi qərara alınıb.
Xatırladaq ki, Türk Dünyası I Meteorologiya Forumu 2021-ci il fevralın 19-da Türkiyənin paytaxtı Ankarada keçirilmişdi.
Bölmənin digər xəbərləri
