İkinci Bakı Beynəlxalq Forumu çərçivəsində keçiriləcək “dəyirmi masa” rəhbərlərinin çıxışları dinlənilmişdir
Bakı, 4 oktyabr (AZƏRTAC). Oktyabrın 5-də II Bakı Beynəlxalq Humanitar Forumu çərçivəsində keçiriləcək “dəyirmi masa” rəhbərlərinin çıxışları dinlənilmişdir.
AZƏRTAC xəbər verir ki, iclasa sədrlik edən mədəniyyət və turizm naziri Əbülfəs Qarayev qonaqları salamlamış və Forumun əhəmiyyətindən danışmışdır.
“Postmodernist mədəniyyətdə ənənəvi dəyərlər sistemi” adlı “dəyirmi masa”ya rəhbərlik edən Rusiya Federasiyası Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy keçirilən Forumun əhəmiyyətindən danışmış, mədəni əlaqələr fonunda qurulmuş əməkdaşlığa diqqət çəkmişdir. O bildirmişdir ki, müasir dünyamızda tərəflərin kompromislərə gələ bilmələri üçün belə dialoqların əhəmiyyəti böyükdür. Bu dialoqlar müxtəlif dillərdə danışan, ayrı-ayrı dini inancları olan insanları bir araya gətirir, onları narahat edən məsələləri birlikdə həll etməyə çağırır.
M.Şvıdkoy insanların ənənələrini itirməyə meyilli olduqlarını qeyd etmiş və vurğulamışdır ki, inkişaf dəyərləri itirmək demək deyildir. “Bu gün hamı deyir ki, mədəniyyət bütün problemləri həll edə bilər. Bəli, o çox şeyi həll edər. Lakin o, iqtisadi, sosial, etik aspektlər vəhdətində nəyisə həll edə bilər”, - deyə “dəyirmi masa” sədri vurğulamışdır.
“Müasir KİV-lər və yeni çağırışlar” dəyirmi masasına rəhbərlik edəcək Xuan Manuel Fonruj çıxışında insan talelərinin həllində kütləvi informasiya vasitələrinin rolunu önə çəkmişdir. O, Argentinanı misal göstərərək demişdir ki, ölkəsində 30 il əvvəl soyqırımı baş vermişdir və o zaman bu hadisə öz əksini dünyada bəlkə də lazımi qədər tapmamışdır. Həmin hadisəni Azərbaycanda baş verən Xocalı soyqırımına bənzədən argentinalı qonaq belə kədərli hadisələrin qarşısını almaq səylərinin təbliğində informasiyalı cəmiyyətin rolunu əvəzolunmaz adlandırmışdır. O demişdir ki, “dəyirmi masa”mızda da məhz bu aspektlərə diqqət yetiriləcəkdir.
Qlobal Tədqiqatlar Mərkəzinin direktoru, Böyük Britaniyalı mütəxəssis Robert Skidelski rəhbərlik edəcəyi “İqtisadi inkişafın humanitar aspektləri” adlı “dəyirmi masa”sının Foruma töhfə verəcəyindən əminliyini ifadə etmişdir. O demişdir ki, bəzən rifahın artması və humanitar dəyərlərin unudulması müəyyən narahatlıqlar yaradır. Demokratiya və iqtisadi artım paralel şəkildə inkişaf etməlidir. İqtisadi artım cəmiyyətin inkişafına öz təsirini hər zaman göstərməkdədir.
ABŞ-dan olan professor Qreqori Belenkin sədrlik edəcəyi “Konvergensiya edən texnologiyalar və gələcəyin konturları” adlı “dəyirmi masa” barədə məlumat vermişdir. O, internet və onun insanların həyatındakı rolundan danışmışdır. Azərbaycanda Elmin İnkişaf Fondu ilə tanış olduğunu deyən qonaq qurumun fəaliyyətini yüksək qiymətləndirmişdir.
Forum çərçivəsində reallaşacaq “XXI əsrdə qloballaşma proseslərinə yeni metodoloji yanaşmalar” adlı “dəyirmi masa”ya sədrlik edəcək Bakı Dövlət Universitetinin rektoru, Milli Məclisin deputatı Abel Məhərrəmov mövzunun əhəmiyyətini vurğulayaraq bildirmişdir ki, bəşəriyyət son hədəf olaraq qlobal vətəndaş cəmiyyəti yaratmaq istəyir və buna belə Forumlar təkan verir. Artıq dünyanın aparıcı dövlətlərinin əksəriyyəti bu istiqamətdə strategiyasını müəyyənləşdirmişdir. Prinsip isə ondan ibarətdir ki, hər bir ölkə daxildə islahatlar aparmaqla yanaşı, qlobal dünya haqqında düşünməlidir.
“Müasir təbabətə baxışı dəyişən texnologiyalar və molekulyar biologiya” adlı “dəyirmi masa”ya rəhbərlik edəcək Azərbaycan Tibb Universitetinin rektoru, Milli Məclisin deputatı Əhliman Əmiraslanov demişdir ki, son illərdə bəzi genetik xəstəliklərin qarşısının əvvəlcədən almaq mümkündür. Bu istiqamətdə, habelə orqan transplantasiyası sahəsində əldə edilmiş nailiyyətlər sevindirici haldır. Lakin məhz transplantasiya sahəsində böyük çətinliklər yaşanır. Belə ki, donorlara ehtiyacı olanların sayı onların sayından qat-qat çoxdur.
Bakı Slavyan Universitetinin rektoru Kamal Abdulla multikulturalizmin problemləri üzrə “dəyirmi masa”ya rəhbərlik edəcəkdir. O, rəhbərlik edəcəyi tədbirin iki fərqli məkanda eyni zamanda keçiriləcəyini və bunlarda 44 qonağın iştirak edəcəyini bildirmişdir. Dünyada monocəmiyyətli quruluşların daim iflasa uğradığını deyən K.Abdulla “dəyirmi masa”da məhz bu problemlərin müzakirə olunacağını bildirmiş, müxtəlif mədəniyyətlərin əhatəsində inkişafın müxtəlif aspektlərinə diqqət çəkiləcəyini vurğulamışdır.
Bölmənin digər xəbərləri
