İkiqat Avropa çempionu: Azərbaycanda olimpiya qızılı qazanan ilk qadın güləşçi olmaq istəyirəm - MÜSAHİBƏ
Bakı, 7 iyul, AZƏRTAC
İtaliyanın Kaorle şəhərində keçirilən U-20 Avropa çempionatında qızıl medal qazanan Günay Qurbanova AZƏRTAC-ın suallarını cavablandırıb. Həmin müsahibəni təqdim edirik.
- İkinci dəfə Avropa çempionu oldunuz. Təəssüratlarınız maraqlıdır...
- Bu Avropa çempionatında da hədəfim qızıl medal idi. Başqa əyarlı medal düşünmürdüm. Yenidən fəxri kürsünün ən yüksək pilləsinə qalxdığım üçün sevincli və qürurluyam.
- Özünüzdən ikinci dəfə bu nəticəni gözləyirdiniz?
- Bəli, qeyd etdiyim kimi, qızıl medaldan başqa heç nə fikirləşmirdim. Turnirdə yalnız çempionluq üçün güləşirdim.
- Bir müddət öncə Azərbaycan qadın güləşinin sayılıb-seçilən idmançılardan Mariya Stadnik yığmada koordinator vəzifəsinə təyin edildi. Bu təyinat barədə nə deyə bilərsiniz?
- Mariya Stadnik Azərbaycan qadın güləşi tarixinə kifayət qədər medallar qazandıran idmançıdır. Bundan sonra da inanıram ki, qızların uğurlarında onun da rolu böyük olacaq.
- Çəki dərəcələriniz eyni olmasa da, özünüzü Mariya Stadnikin davamçısı olaraq görürsünüzmü?
- Bildiyiniz kimi, Azərbaycan qadın güləşi tarixində olimpiya qızılı yoxdur. Eyni zamanda, yerli qızlardan bu yarışda iştirak edən olmayıb. Arzum budur ki, Olimpiya Oyunlarında iştirak edib, ilk qızıl medalı məhz mən qazanım.
- Azərbaycan qadın güləşinin hazırkı durumunu necə qiymətləndirirsiniz?
- Ölkəmizdə qadın güləşi günü-gündən inkişaf edir. Bu, danılmaz faktdır. Artıq hər yaş qrupunda çıxış edən qızlar beynəlxalq turnirlərdə müxtəlif əyarlı medallar qazanmağı bacarırlar. Belə davam etsək, əminəm ki, bir neçə ildən sonra böyüklər arasında dünya və Avropa çempionları olacaq.
Bölmənin digər xəbərləri
