İlahiyyat İnstitutunun yeni rektoru kollektivə təqdim olunub

13.05.2020 [14:41]
Çap et
A⁺ A^-

Bakı, 13 may, AZƏRTAC

Prezident İlham Əliyevin Sərəncamı ilə Azərbaycan İlahiyyat İnstitutunun rektoru təyin edilən Aqil Şirinovu Dini Qurumlarla İş üzrə Dövlət Komitəsinin sədri Mübariz Qurbanlı ali təhsil müəssisəsinin rəhbər heyətinə təqdim edib.

İlahiyyat İnstitutundan AZƏRTAC-a bildirilib ki, Mübariz Qurbanlı çıxışı zamanı ali təhsil müəssisəsinin yaradılma məqsədi, qarşıda duran vəzifələri haqqında danışıb. İnstitutun yetişdirdiyi kadrların milli-mənəvi dəyərlərimizin qorunmasına layiqli töhfələr verəcəyinə ümidvar olduğunu qeyd edib. Aqil Şirinovun elmi fəaliyyətindən söz açan Mübariz Qurbanlı yeni təyinatı münasibətilə onu təbrik edib və fəaliyyətində uğurlar arzulayıb.

Daha sonra rektor Aqil Şirinov ona göstərilən böyük etimada görə ölkə rəhbərliyinə minnətdarlığını bildirib. Vurğulayıb ki, bundan sonra fəaliyyətini ali təhsil müəssisəsinin daha da inkişaf etməsinə həsr edəcək.

Xatırladaq ki, Azərbaycan İlahiyyat İnstitutu Prezident İlham Əliyevin 2018-ci il 9 fevral tarixli Sərəncamına əsasən Dini Qurumlarla İş üzrə Dövlət Komitəsinin tabeliyində yaradılıb.

İnstituta yeni təyin olunan rektor daha əvvəl Elm və innovasiyalar üzrə prorektor vəzifəsində çalışıb.