İlin əvvəlindən Almaniya 16,5 milyard kilovat-saat nüvə enerjisi idxal edib
Berlin, 7 dekabr, AZƏRTAC
Almaniyanın bu il idxal etdiyi 40 milyard kilovat-saatlıq elektrik enerjisinin 16,5 milyard kilovat-saatı nüvə enerjisinin payına düşür. Bu, rekord göstəricidir.
AZƏRTAC xəbər verir ki, bu barədə “Bild” qəzetində yayımlanan xəbərdə qeyd olunub.
Xəbərdə bildirilib ki, hələ 2022-ci ildə fəaliyyətdə olan üç atom elektrik stansiyası təxminən 32 milyard kilovat-saat elektrik enerjisi istehsal edib. Bu, o deməkdir ki, Almaniya 2022-ci ildə istehsal etdiyi nüvə enerjisinin yarısını bu il xaricdən idxal edib. “Nüvə Enerjisi Hesabatı”na əsasən, 2024-cü ildə Almaniyanın ümumi elektrik enerjisi idxalı ötən illə müqayisədə üç dəfə artıb. İdxal olunan elektrik enerjisinin yarısı elektrik enerjisi istehsalında nüvə enerjisinin üstünlük təşkil etdiyi Fransa, İsveçrə və Belçikadan təmin olunur.
Almaniya atom enerjisindən imtina etdikdən sonra enerji ixracatçısından idxalatçıya çevrilib. 2022-ci ilin dekabrından 2023-cü ilin noyabrınadək Fransaya 1,79 milyard kilovat-saat elektrik enerjisi ixrac edən Almaniya ötən ilin dekabrından 2024-cü ilin noyabrınadək bu ölkədən 13,19 milyard kilovat-saat elektrik enerjisi idxal edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
