İordaniya nəşri: Azərbaycan Ermənistanla sərhəddəki öz ərazisində nəzarəti gücləndirir
Bakı, 29 aprel, AZƏRTAC
Azərbaycan Laçın yolunda nəzarət-buraxılış məntəqəsi açmaqla Ermənistanla sərhəddəki öz ərazisində suveren hüquqlarını tam bərpa edir və nəzarəti gücləndirir.
AZƏRTAC xəbər verir ki, bu fikirlər İordaniyanın rəsmi “Addsutur” nəşrində dərc olunmuş məqalədə yer alıb. Yazıda qeyd edilib ki, Azərbaycan Xarici İşlər Nazirliyinin bununla bağlı yaydığı bəyanatda Azərbaycan Hökumətinin Ermənistan tərəfinin Laçın-Xankəndi yolundan 2020-ci il 10 noyabr tarixli üçtərəfli Bəyanata zidd şəkildə sistemli və genişmiqyaslı qanunsuz məqsədlər üçün sui-istifadənin davam etdiyini və bundan qaynaqlanan təhlükəsizlik hədələrini nəzərə alaraq, Azərbaycan ilə Ermənistan arasında sərhəddə yolun başlanğıcında nəzarətin təmin edilməsi məqsədilə müvafiq tədbirlər həyata keçirdiyi vurğulanıb.
İordaniyalı oxucuların diqqətinə çatdırılıb ki, üçtərəfli Bəyanatın imzalanmasından keçən iki il yarım müddət ərzində Azərbaycan tərəfi davamlı şəkildə Laçın yolunun Ermənistan tərəfindən genişmiqyaslı sui-istifadə hallarına diqqəti cəlb edib. Bu cür sui-istifadə hallarına Azərbaycan ərazisində qalmaqda davam edən erməni silahlı qüvvələrinin şəxsi heyətinin rotasiyası, silah və sursatın daşınması, terrorçuların keçidi, habelə təbii sərvətlərin və mədəni mülkiyyətin qanunsuz daşınmasını misal göstərmək olar.
Məqalədə daha sonra vurğulanıb ki, Ermənistan tərəfinin Laçın yolundan minaları daşıyaraq sonradan Azərbaycan Respublikasının suveren ərazilərində basdırması xüsusilə ağır fəsadlar doğurur. 2022-ci ilin avqust ayından etibarən Laçın və Kəlbəcər rayonlarının ərazisində 2021-ci il Ermənistan istehsalı olan 2700-dən çox piyada əleyhinə mina aşkar edilib. Sonuncu dəfə 2023-cü il aprelin 22-də Azərbaycan Ordusunun hərbi yük maşını ermənilər tərəfindən basdırılmış 2021-ci il istehsalı minaya düşərək partlayıb və 3 hərbi qulluqçu yaralanıb. Müharibənin sonundan etibarən 294 azərbaycanlı mina qurbanı olub. Bununla yanaşı, aprelin 22-də Ermənistana məxsus yük avtomobilləri ilə iki ədəd hərbi məqsədlər üçün yaşayış konteynerlərinin və hərbi avtomobillər konvoyunun üçtərəfli Bəyanata və beynəlxalq hüququn norma və prinsiplərinə zidd olaraq Azərbaycan ərazisinə keçirildiyi Azərbaycan Respublikası Müdafiə Nazirliyinin müşahidə kameraları tərəfindən qeydə alınıb. Daha sonra Ermənistan tərəfindən Laçın-Xankəndi yolunun başlanğıcında Azərbaycan ərazisinə ən yaxın məntəqədə hərbi yaşayış konteynerlərinin yerləşdirilməsi və hərbi infrastruktur qurmaq fəaliyyəti müşahidə edilib.
Sonda qeyd edilib ki, Azərbaycan tərəfi göstərilən təhdid və təxribatları nəzərə alaraq Laçın yolunun başlanğıcında sərhəd-nəzarət mexanizmini təsis edib və bu addım yoldan hərəkət üzrə şəffaflığı, qanunun aliliyini və beləliklə, hərəkətin təhlükəsizliyini təmin edəcək. Eyni zamanda, bu əlavə tədbir çərçivəsində Azərbaycanın Qarabağ bölgəsində yaşayan erməni sakinlərin bu məntəqədən hər iki istiqamətdə Ermənistana və Azərbaycana şəffaf və nizamlanan keçidi üçün müvafiq şərait yaradılacaq.
Bölmənin digər xəbərləri
