İordaniya şahzadəsi son 15 ildə Azərbaycanın əldə etdiyi uğurları təqdir edib
Bakı, 2 may, AZƏRTAC
Mayın 2-də Azərbaycanın İordaniyadakı səfiri Rasim Rzayev ilə İordaniya şahzadəsi, Minalardan Təmizləmə və Reabilitasiya üzrə İordaniya Milli Komitəsinin sədri, İordaniyada Əlil Hərbçilər üzrə Haşimi Komissiyasının sədri, İordaniya Paralimpiya Komitəsinin sədri Mirad bin Raad əl-Hüseyn arasında görüş keçirilib.
AZƏRTAC xəbər verir ki, ölkəmizin Əmmandakı səfirliyində keçirilən görüşdə İordaniya şahzadəsi Azərbaycanın İordaniyadakı səfiri təyin edilməsi münasibətilə səfir R.Rzayevi təbrik edib, xoş arzularını bildirib.
Azərbaycana böyük rəğbət bəslədiyini diqqətə çatdıran şahzadə son 15 ildə respublikamızın sürətlə inkişaf etməsindən, ölkəmizin siyasi, iqtisadi, sosial və mədəni həyatın müxtəlif sahələrində əldə etdiyi uğurlardan məmnunluğunu ifadə edib. Mirad bin Raad əl-Hüseyn 2009-cu ilin 3-6 may tarixlərində Azərbaycana səfər etdiyini, onu müşayiət edən nümayəndə heyəti ilə birlikdə Azərbaycan Respublikası Ərazilərinin Minalardan Təmizlənməsi üzrə Milli Agentliyinin (ANAMA) əməliyyatlar apardığı Füzuli rayonunda olduğunu, xarici işlər nazirinin müavini A.Əzimov ilə görüşdüyünü və ölkəmizdən xoş təəssüratlarla ayrıldığını məmnunluqla xatırlayıb.
Ərazilərin minalardan təmizlənməsi və reabilitasiyası, əlilliyi olan şəxslərin sosial müdafiəsi və reabilitasiyası, habelə paralimpiya oyunları sahələrində də Azərbaycanın böyük nailiyyətlər əldə etdiyindən xəbərdar olduğunu bildirən İordaniya şahzadəsi ölkəmizin, eyni zamanda, turizm imkanları ilə zəngin olduğunu bildirib. O, ölkələrimiz arasında turizm sahəsində əməkdaşlıq əlaqələrinin gücləndirilməsinin zəruriliyini vurğulayıb.
Rəhbərlik etdiyi qurumların fəaliyyəti barədə məlumat verən şahzadə Mirad İordaniyanın Yaxın Şərqdə minalı sahələrdən azad ilk ölkə olduğunu, “Piyadalar əleyhinə minaların istifadəsi, ehtiyatının toplanması, istehsalı və ötürülməsinin qadağan olunması və onların məhv edilməsi” haqqında Ottava konvensiyasının öhdəliklərini yerinə yetirdiyini, 2017-ci ildə İordaniyada “Əlil şəxslərin hüquqları haqqında” qanunun qəbul edildiyini deyib. O, rəhbərlik etdiyi qurumların fəaliyyəti ilə tanış olmaq üçün səfir R.Rzayevi və səfirlik əməkdaşlarını qurumların yerləşdiyi ünvanlara dəvət edib.
2012-ci ilin 23-25 aprel tarixlərində ANAMA-nın direktorunun İordaniya ərazisində mina sahələrində təmizləmə əməliyyatlarının bitməsinə həsr olunmuş “Minasız İordaniya” mərasimində iştirak etdiyini diqqətə çatdıran İordaniya şahzadəsi müvafiq dəvət olacağı təqdirdə rəhbərlik etdiyi qurumların fəaliyyət istiqamətləri üzrə azərbaycanlı həmkarları ilə müzakirələr aparmaq, habelə Azərbaycanın turizm imkanları ilə daha yaxından tanış olmaq məqsədilə ölkəmizə səfər etməyə hazır olduğunu bildirib.
Təbrikə və Azərbaycan haqqında xoş sözlərə görə minnətdarlığını ifadə edən R.Rzayev iki ölkə arasında uğurlu dostluq və əməkdaşlıq əlaqələrindən danışıb, Prezident İlham Əliyev ilə Kral II Abdullah arasındakı şəxsi dostluq münasibətlərinin bu əlaqələrə müsbət təsirini vurğulayıb. Səfir ikitərəfli münasibətlərin, o cümlədən ərazilərin minalardan təmizlənməsi və reabilitasiyası, əlilliyi olan şəxslərin sosial müdafiəsi və reabilitasiyası, paralimpiya oyunları, habelə turizm sahələrində əməkdaşlıq əlaqələrinin daha da inkişaf etdirilməsi üçün mövcud olan imkanlar barədə məlumat verib və bu imkanlardan daha səmərəli istifadə edilməsinin zəruriliyini bildirib.
Görüşdə Ermənistan-Azərbaycan, Dağlıq Qarabağ münaqişəsi, Ermənistanın həyata keçirdiyi təcavüzkarlıq və etnik təmizləmə siyasəti, Azərbaycan xalqına qarşı törədilmiş soyqırımları, Azərbaycan Respublikası ərazisinin 20 faizinin işğalı, nəticədə bir milyondan çox vətəndaşımızın qaçqın və məcburi köçkün vəziyyətinə düşməsi barədə qarşı tərəfə ətraflı məlumat verilib, münaqişə ilə bağlı İordaniyanın ədalətli və sabit mövqeyinə görə təşəkkür ifadə edilib.
Səfir R.Rzayev Azərbaycan Xalq Cümhuriyyətinin 100 illiyi, 2018-ci ilin ölkəmizdə “Azərbaycan Xalq Cümhuriyyət İli” elan edilməsi barədə məlumat verib, yaxın günlərdə bu münasibətlə keçiriləcək təntənəli tədbirdə iştirakla bağlı dəvət məktubunu təqdim edib.
Görüşdə Minalardan Təmizləmə və Reabilitasiya üzrə İordaniya Milli Komitəsinin direktoru Məhəmməd Breikat və səfirliyin müşaviri İlham Əliyev də iştirak ediblər.
Bölmənin digər xəbərləri
