İQLİM DƏYİŞKƏNLİYİ TƏBİİ FƏLAKƏTLƏRİN ARTMASINA SƏBƏB OLUR
AZƏRTAC-ın xüsusi müxbiri Belçikanın Luven Katolik Universitetinin uzun illər apardığı araşdırmaların nəticələrinə dair “Cenevrədə qəzaların başvermə səbəblərini əvvəlcədən öyrənmək” məsələsinə həsr olunmuş beynəlxalq konfransa təqdim etdiyi statistik məlumatlara istinadən xəbər verir ki, təbii fəlakətlərin törətdiyi ağır fəsadlar nəticəsində ölənlərin də sayı durmadan artır. Belə ki, təbii fəlakətlər 1990-cı ildə 53 min insanın həyatına son qoymuşdursa, ötən il onların sayı 83 min nəfərə çatmışdır.
Qəzaların səbəblərini araşdıran beynəlxalq strategiya mərkəzinin direktoru italiyalı alim Salvano Briçeno bildirmişdir ki, insanlar təbii fəlakətlərlə mübarizədə getdikcə daha çox zəif məxluqa çevrilirlər. Buna səbəb onların əksəriyyətinin riskli şəhər zonalarında yaşamağa məcbur olmalarıdır.
Statistik məlumatlara əsaslanan proqnozlara görə, 2025-ci ildə dünya əhalisinin 5 milyardı şəhərlərdə yaşayacaqdır. Onlardan 2 milyardı daşqınlar, zəlzələlər və yer sürüşmələri ilə üzləşməli olacaqdır. Ona görə ki, dünyanın 100 ən böyük şəhərindən 70-i riskli zonada yerləşir.
Uzun araşdırmalardan sonra alimlər belə bir nəticəyə gəlmişlər ki, təbii fəlakətlərə səbəb bizi əhatə edən təbiətdə tez-tez baş verən iqlim dəyişkənliyidir.
