İqtidar-xalq həmrəyliyi düşmənlərimizə gözdağı verir
Bakı, 16 iyul, AZƏRTAC
Uzun illərdir ki, beynəlxalq təşkilatların Dağlıq Qarabağ münaqişəsinin həllində ikili mövqedən çıxış etməsi, rəsmi İrəvana siyasi-iqtisadi təzyiqlərin göstərilməməsi düşmən ölkənin Azərbaycana qarşı yeni iddialarına rəvac verməkdədir. Ermənistan silahlı qüvvələrinin iyulun 12-də Tovuz rayonunun sərhəd kəndlərində törətdiyi təxribatlar və dövlət sərhədimizə qarşı təcavüz cəhdləri də bunu bir daha təsdiqlədi. Baxmayaraq ki, işğalçı ölkənin təxribatlarının qarşısı Azərbaycan ordusu tərəfindən alındı və düşmənə layiqli cavab verildi. Bununla belə Ermənistanın silahlı qüvvələrinin Azərbaycanın dövlət sərhədində təxribatlar törətməsi, dinc sakinləri və yaşayış məntəqələrini atəşə tutması, mülki vətəndaşın qətlə yetirilməsinə ölkəmizə dost olan dövlətlər istisna olmaqla, əksər beynəlxalq təşkilatlar hələ də “kar və kor” kimi yanaşırlar. Bu da beynəlxalq aləmin ölkəmizə qarşı münasibətdə ikiüzlü siyasət apardığını bir daha təsdiqləmiş oldu.
Bunu AZƏRTAC-a müsahibəsində Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin İnformasiya şöbəsinin müdiri Vüsalə Rafiqqızı deyib.
V.Rafiqqızının sözlərinə görə, başqa vaxt tərəfləri sülhə, “qarşılıqlı kompromislərə” çağıran, il ərzində regiona sanki turist səfərinə gələn ATƏT-in Minsk qrupunun varlığı bu hadisələrin yaşandığı bir neçə gündə ümumiyyətlə hiss olunmadı. Eləcə də Minsk qrupuna həmsədrlik edən ölkələrin “tərəfləri qarşılıqlı olaraq atəşi dayandırmağa çağırması” cəmiyyətdə ikrah hissi ilə qarşılandı. Xarici donorların qapısında dilənən erməni əsilli və erməni təfəkkürlü insanların dövlətimizə, ölkəmizə, ordumuza qarşı şər, böhtanlarına ikiəlli dəstək verən ATƏT, Avropa Şurası və bu kimi digər beynəlxalq təşkilatların Tovuzda baş verən erməni təxribatları ilə bağlı hələ də mövqeyi aydın deyil. Sanki bu təşkilatlar ancaq Azərbaycana qarşı ikili standartlar, qondarma “siyasi məhbus” mövzularında müzakirə açmaq missiyasını daşıyırlar.
O, bildirib ki, bununla belə istər cəbhədə Azərbaycan ordusunun əsgərinin göstərdiyi şücaət, istərsə də xalqımızın baş verənlərlə bağlı küçələrə axışaraq öz ordusuna, Ali Baş Komandanına verdiyi dəstək həm işğalçı ölkə, həm də dünya üçün bir mesaj idi. Xalqımız bununla göstərdi ki, bugünkü Azərbaycan 90-cı illərin əvvəllərindəki Azərbaycan deyil. Bu gün Azərbaycanın nizami ordusu var. Nəinki regionda, bütün dünya ölkələrinin liderləri arasında öz nüfuzu ilə seçilən siyasi lideri - qətiyyətli Ali Baş Komandanı var. Ən əsası Azərbaycan xalqı öz ordusunun və Ali Baş Komandanının arxasındadır. Ali Baş Komandanın torpaqlarımızın işğaldan azad edilməsi ilə bağlı verəcəyi əmrə müntəzirdir. Çünki Azərbaycan xalqı bütün problemlərin həllində öz Prezidentinə arxalanır, inanır və güvənir. Düşmənin Tovuzda törətdiyi təxribatlarla bağlı xalqımız da küçələrə axışaraq bütün dünyaya bəyan etdi ki, Azərbaycan xalqı vahiddir, həmrəydir. Hətta siyasi baxışlarından asılı olmayaraq, xalq vahid şəkildə öz Prezidentini və ordusunu dəstəkləyir. Təbii ki, bu həm ermənilərin, həm də daima Azərbaycanda daxili qarışıqlıq yaratmaq istəyən xarici dairələr və onların burdakı “quyruqları” üçün gözdağı idi. Ona görə də onlar bu hadisələrin istiqamətini dəyişmək, yalançı narazılıq görüntüləri yaratmağa cəhdlər etdilər. Ön cəbhədə torpağımız uğrunda canlarından keçən əsgərlərimiz, zabitlərimiz şəhidlik məqamına yüksəldiyi bir vaxtda kimlərinsə ölkədə qarışıqlıq yaratmaq istəyi şərəfsizliyin ən son həddidir. Bu da yəqin ki, öz hüquqi qiymətini alacaq.
Odur ki, iri dövlətlərin oyuncağına çevrilən Ermənistan və onun havadarlarının Azərbaycana qarşı bütün məkrli və xain xülyaları puça məhkumdur.
Tanrı xalqımızı, Prezidentimizi, ordumuzu və dövlətimizi qorusun!
Bölmənin digər xəbərləri
