İQTİSADİ ƏLAQƏLƏRİN İNKİŞAFI ÜZRƏ AZƏRBAYCAN-QAZAXISTAN İŞÇİ QRUPUNUN GÖRÜŞÜ OLMUŞDUR
Qazaxıstan tərəfini energetika və mineral ehtiyatlar nazirinin müavini Ləzzət Kiinovun rəhbərliyi ilə sənaye və ticarət nazirinin müavini Bolat Smaqulov, əmək və əhalinin sosial müdafiəsi nazirinin müavini Gülşara Abdıkalikova, nəqliyyat və kommunikasiyalar nazirinin müavini Talqat Abulqazin, baş nazirin müşaviri Kenjemurat Dukenbayev, müxtəlif dövlət komitələrinin, səhmdar cəmiyyətlərin nümayəndələri təmsil etmişlər.
İqtisadi inkişaf nazirinin müavini Mikayıl Cabbarov qonaqları salamlayaraq demişdir ki, Azərbaycan və Qazaxıstan strateji tərəfdaşdırlar və hər iki ölkənin xalqlarını onların ümumi mədəni-tarixi ənənələri, vacib coğrafi-siyasi məkana malik olmaları, həll edilən məsələlərin oxşarlığı daha da yaxınlaşdırır. Qazaxıstan ölkəmizin xarici iqtisadi siyasətində üstün istiqamətlərdən birinə malikdir. Azərbaycan Prezidenti İlham Əliyevin dost ölkəyə yeni başa çatmış rəsmi səfəri buna aydın sübutdur. Səfər ölkələrimiz arasında iqtisadi münasibətlərin inkişafına sanballı töhfə verəcəkdir. İqtisadi əməkdaşlıq üzrə Qazaxıstan-Azərbaycan hökumətlərarası komissiyasının fevralın 27-28-də Astanada keçirilmiş iclası göstərdi ki, əmtəə dövriyyəsini xeyli artırmağa gözəl imkanlar vardır.
Nazirliyin aparatının rəhbəri Samir Vəliyev ölkəmizdə ümummilli liderimiz Heydər Əliyevin rəhbərliyi altında hazırlanmış sosial-iqtisadi inkişaf strategiyasının bəhrələrindən, “Əsrin müqaviləsi”nin həyata keçirilməsi gedişindən, qeyri-neft sahələrinin inkişafı və “Böyük İpək yolu”nun bərpası istiqamətlərində görülən işlərdən, əhalinin sosial vəziyyətinin yaxşılaşdırılması üçün qəbul edilmiş Dövlət Proqramlarından, Azərbaycanın beynəlxalq maliyyə qurumları ilə əlaqələrinin möhkəmləndirilməsindən söz açmışdır.
İkitərəfli münasibətlərin perspektivlərinə toxunan natiq neft maşınqayırması, bitkiçilik və heyvandarlıq sahələrində əməkdaşlıq, Qazaxıstan neftinin və digər yüklərin Azərbaycan ərazisindən daşınması, bu ölkədə hasil edilən xam neftin respublikamızda emalı, tranzit yüklərin saxlanılması üçün müvafiq terminalların tikilməsi, buraxılış məntəqələrində sərhəd-gömrük qaydalarının sadələşdirilməsi məsələlərini xüsusi vurğulamışdır.
Qazaxıstanın energetika və mineral ehtiyatlar nazirinin müavini Ləzzət Kiinov bildirmişdir ki, Bakıya indiki səfərdən məqsəd Astanada hər iki ölkə arasında imzalanmış sənədlərin kağız üzərində qalmayacağını sübuta yetirməkdir. Bundan ötrü böyük imkanlar vardır və biz bu imkanlardan maksimum istifadə etməliyik. Nümayəndə heyətimizin tərkibi fikir mübadiləsi, danışıqlar aparmağa lazımi imkan yaradır. O, öz ölkəsinin iqtisadi uğurları, həyata keçirilən iqtisadi siyasət, sərmayə imkanları, biznes mühiti haqqında geniş məlumat vermiş, Azərbaycanla əlaqələrin genişləndirilməsində, birgə müəssisələrin yaradılmasında maraqlı olduqlarını xüsusi vurğulamışdır.
Azərbaycan işgüzar dairələrinin nümayəndələri fəaliyyət sahələri barədə danışmış, istehsal etdikləri məhsulların dünya standartlarına cavab verdiyini vurğulamış və Qazaxıstan tərəfini qarşılıqlı faydalı əməkdaşlığa çağırmışlar.
Bölmənin digər xəbərləri
