İQTİSADİ İNKİŞAF NAZİRLİYİNİN MƏLUMATI
Azərbaycan Respublikası Prezidentinin “Azərbaycan Respublikasında ticarətin tənzimlənməsi sahəsində əlavə tədbirlər haqqında” 23 iyul 1999-cu il tarixli Fərmanı ilə təsdiq edilmiş “Azərbaycan Respublikasında 1999-2002-ci illər üçün ticarətin inkişafı üzrə Dövlət Proqramı”nda ölkəmizin Ümumdünya Ticarət Təşkilatına qəbul prosesinin sürətləndirilməsi əsas tədbirlərdən biri kimi göstərilmişdir.
Bu Fərmanın icrasını təmin etmək məqsədi ilə Azərbaycan Respublikası Nazirlər Kabinetinin 19 noyabr 1999-cu il tarixli Sərəncamı ilə Azərbaycanın iqtisadi siyasətinin və xarici ticarət rejiminin ÜTT-nin qayda və normalarına uyğunluğunun müəyyənləşdirilməsi, bu sahədə lazımi tədbirlərin həyata keçirilməsi üçün müvafiq nazirlik və təşkilatların nümayəndələrindən ibarət əlaqələndirmə qrupu yaradılmışdır.
2002-ci il martın 27-də İqtisadi İnkişaf Nazirliyində Azərbaycanın ÜTT-yə üzv olmasının sürətləndirilməsinə yardım göstərmək və dəstək vermək üçün Bakıya gəlmiş Türkiyənin ekspertlər qrupu ilə görüş keçirilmişdir.
Görüşü iqtisadi inkişaf naziri Fərhad Əliyev açaraq, son illərdə Azərbaycan Respublikasının Prezidenti Heydər Əliyevin rəhbərliyi altında həyata keçirilən iqtisadi islahatlardan, əldə olunmuş nailiyyətlərdən geniş bəhs etmiş, Azərbaycanın beynəlxalq iqtisadi təşkilatlar ilə əlaqələrinin inkişafından danışmışdır. O, dövlət başçısının müəyyən etdiyi iqtisadi inkişaf xəttinin tərkib hissəsi olaraq, ölkəmizin ÜTT-yə qəbul edilməsinin xüsusi əhəmiyyət kəsb etdiyini vurğulamış, Azərbaycanın bu mötəbər təşkilatın üzvlüyünə daxil olması istiqamətində görülən işlər barəsində məlumat vermişdir. Nazir qeyd etmişdir ki, ölkənin ÜTT-yə üzvolma prosesi 1997-ci ilin iyun ayından dövlət başçısının tapşırığı ilə Azərbaycan Respublikası hökumətinin bu təşkilata üzvolma niyyətini bildirməsi ilə başlanmış və bu tarixdən Azərbaycan ÜTT-yə müşahidəçi kimi qəbul olunmuşdur. Azərbaycan Respublikasınının xarici ticarət fəaliyyətinin bütün aspektlərini əhatə edən “Xarici ticarət rejimi haqqında memorandum” hazırlanmış və ÜTT-nin Cenevrədəki katibliyinə təqdim edilmişdir. Bundan sonra üzv ölkələr Yaponiya, ABŞ və Avropa Birliyindən daxil olmuş suallara ətraflı cavab verilmişdir. Hazırda Azərbaycanın bu mötəbər quruma üzv olmasına hazırlıq prosesi gedir.
Nazir F.Əliyev ÜTT-yə daxilolma prosesində Türkiyə ekspertlərinin yardımına ehtiyac olduğunu vurğulamış, bu sahədə ABŞ-ın da Azərbaycana dəstək verdiyini görüş iştirakçılarının nəzərinə çatdırmış, bu məqsədlə ABŞ-ın Azərbaycana 1 milyon dollar həcmində qrant ayırdığını bildirmişdir.
Görüşdə iştirak edən Türkiyənin Azərbaycandakı səfiri Ü.Çeviköz Azərbaycanın müstəqillik əldə etdikdən sonra beynəlxalq təşkilatlarla əlaqələrinin yüksək səviyyədə qurulduğunu qeyd edərək, ölkənin ÜTT-yə üzv olmasının vacibliyindən danışmış və türkiyəli ekspertləri görüş iştirakçılarına təqdim etmişdir.
Sonra Türkiyədən gəlmiş ekspertlər əlaqələndirmə qrupunun üzvləri ilə geniş fikir mübadiləsi aparmış, ÜTT-yə üzvolma prosesinin bir sıra məqamlarına aydınlıq gətirmişlər.
Bölmənin digər xəbərləri
