İQTİSADİ İNKİŞAF NAZİRLİYİNİN MƏLUMATI
Məlum olduğu kimi, ölkədə əlverişli investisiya mühitinin yaradılması, təbii inhisar subyektlərinin fəaliyyətinin dövlət tənzimlənməsinin təkmilləşdirilməsi və həmin subyektlərin tariflərinə yenidən baxılması işlərinin daha məqsədyönlü və çevik həyata keçirilməsi, tariflərin (qiymətlərin) iqtisadi inkişafın tələblərinə uyğun olaraq dövlət tərəfindən tənzimlənməsini təmin etmək məqsədi ilə Azərbaycan Respublikası Nazirlər Kabinetinin qərarı ilə Azərbaycan Respublikası Tarif (qiymət) Şurası yaradılmışdır.
Şuranın əsasnaməsinə müvafiq olaraq onun əsas vəzifələrindən biri təbii inhisar subyektlərinin istehsal etdiyi məhsulların, göstərdiyi xidmətlərin tariflərinin (qiymətlərinin) mövcud tənzimlənməsi praktikasını təkmilləşdirmək, tənzimləmədə dövlətin iqtisadi siyasətinin daha səmərəli həyata keçirilməsi üçün əlverişli şərait yaratmaqdır.
Şuranın qarşısında duran vəzifələrin icrasının təmin edilməsi məqsədi ilə Tarif (qiymət) Şurasının katibliyi nəzdində 12 sahə üzrə işçi qrupları yaradılmış, tarif (qiymət) siyasətinin səmərəliliyinin və inhisarçı təsərrüfat subyektlərinin investisiya cəlbediciliyinin artırılması baxımından bir sıra müvafiq təkliflər və inhisar subyektlərinin tariflərinin (qiymətlərinin) tənzimlənməsi barədə normativ sənədlər hazırlanaraq Şuranın iclasında baxılmaq üçün təqdim edilmişdir. Şuranın işçi qruplarının iclasında məsələlərin ilkin müzakirəsi keçirilmişdir.
Yaxın günlərdə Tarif (qiymət) Şurasının növbəti iclasının keçirilməsi və Şuranın katibliyinə təqdim olunmuş təkliflərin müzakirə edilməsi nəzərdə tutulur.
Bölmənin digər xəbərləri
