İQTİSADİ İNKİŞAF NAZİRLİYİNİN MƏLUMATI
“Enerji və su sektorunda maliyyə intizamının gücləndirilməsi tədbirləri haqqında” Azərbaycan Respublikası Prezidentinin 25 mart 2002-ci il tarixli Sərəncamı ilə müəyyən edilmiş vəzifələrin icrası ilə əlaqədar İqtisadi İnkişaf Nazirliyində müşavirə keçirilmişdir.
Azərbaycan Respublikası Prezidentinin Sərəncamının icrasını təmin etmək məqsədi ilə İqtisadi İnkişaf Nazirliyinin qarşısında qoyulmuş vəzifələrin əhəmiyyətini vurğulayan nazir Fərhad Əliyev bu vəzifələrin həyata keçirilməsi ilə əlaqədar nazirliyin qurumlarının işini müəyyənləşdirən əmrin imzalandığını və bu əmrlə konkret müddətlər göstərilməklə, struktur bölmələrə müvafiq tapşırıqlar verildiyini qeyd etdi. Nazir işlərin gedişi, xüsusilə büdcədən maliyyələşən təşkilatlar üçün kommunal xidmətlərdən istifadə ilə bağlı limitlərin müəyyənləşdirilməsi, yaxın müddətdə kommunal xidmətlərin ödənişində kart sisteminin tətbiqi, kommunal xidmətlərə görə güzəştli istifadə hüququna malik vətəndaşlara dövlət büdcəsindən kompensasiyaların verilməsi və bu sahədə yaranan problemlərin həlli, yanacaq-energetika kompleksinə daxil olmayan əsas enerji istehlakçıları olan iri müəssisələrin restrukturizasiyası, iri tədiyəçilərin idarəetmə strukturunun təkmilləşdirilməsi, köməkçi xidmət sahələrinin özəlləşdirilməsi, müəssisələrin rentabelliyinin artırılması, istilik elektrik stansiyalarının qazla işləmə rejiminə keçirilməsi, su sektorunun restrukturizasiyası planı çərçivəsində müəssisə, idarə və təşkilatların bazasında səhmdar cəmiyyətlərinın yaradılması, onların uzunmüddətli idarəetməyə verilməsi ilə əlaqədar tenderlərin keçirilməsi, bu sahədə tənzimləmə məsələləri ilə bağlı yeni normativ-hüquqi sənədlərə dair təkliflərin hazırlanmasının vəziyyəti ilə maraqlandı.
Nazirliyin struktur bölmələrinin rəhbərləri qeyd olunan məsələlər üzrə işlərin gedişi barədə ətraflı məlumat verərək bildirdilər ki, artıq bir sıra təkliflər, o cümlədən Azərbaycan Respublikasının su təchizatı və kanalizasiya sektorunda islahatların sürətləndirilməsi ilə əlaqədar regional su və kanalizasiya şəbəkələrinin yaradılması və idarəetməyə verilməsi, neft, neft-kimya müəssisələrinin strukturunun təkmilləşdirilməsi, qaz təsərrüfatı sektorunda islahatların sürətləndirilməsi məqsədi ilə regional paylayıcı qaz şəbəkələrinin yaradılması və idarəetməyə verilməsi ilə bağlı və digər təkliflər hazırlanaraq aidiyyatı üzrə təqdim edilmişdir. Struktur bölmələrin rəhbərləri həmçinin, Dünya Bankının İBTA-1 layihəsi çərçivəsində ayrılmış texniki yardımdan istifadə etməklə su və qaz şəbəkələrinin restrukturizasiyası, özəlləşdirmənin sosial təsirinin istiqamətləndirilməsi sahəsində də tədbirlərin həyata keçirildiyini qeyd etdilər.
Hazırda digər tapşırıqların icrası ilə bağlı intensiv işlər aparılır, zəruri hallarda əlaqədar təşkilatların nümayəndələrinin də cəlb ediləcəyi işçi qruplarının yaradılması nəzərdə tutulur.
Nazir F.Əliyev müşavirəni yekunlaşdıraraq, qarşıya qoyulmuş vəzifələrin icrasının yüksək səviyyədə təmin olunması üçün konkret tapşırıqlar verdi.
Bölmənin digər xəbərləri
