“İqtisadiyyatda qadın qüdrəti” mövzusunda tədbirdə qadın sahibkarların rolu yüksək qiymətləndirilib
Bakı, 3 mart, AZƏRTAC
Azərbaycanda Qadın Sahibkarlığının İnkişafı Assosiasiyasının (AQSİA) təşkilatçılığı, Kiçik və Orta Biznesin İnkişafı Agentliyinin (KOBİA) dəstəyi ilə Ümummilli Lider Heydər Əliyevin 100 illik yubileyinə həsr olunmuş “İqtisadiyyatda qadın qüdrəti” mövzusunda tədbir keçirilib.
AZƏRTAC xəbər verir ki, tədbirdə əvvəlcə Azərbaycanın Dövlət Himni səsləndirilib və ölkəmizin ərazi bütövlüyü uğrunda canlarını qurban vermiş şəhidlərimizin xatirəsi bir dəqiqəlik sükutla yad edilib. Ümummilli Lider Heydər Əliyevin qadınların ictimaiyyətdə rolu ilə bağlı fikirlərinin səsləndirdiyi videoçarx nümayiş edilib.
Tədbirdə giriş nitqi ilə çıxış edən Azərbaycanda Qadın Sahibkarlığının İnkişafı Assosiasiyasının İdarə Heyətinin sədri Səkinə Babayeva Ulu Öndər Heydər Əliyevin Azərbaycan qadınını dəyanət və sədaqət rəmzi kimi dəyərləndirdiyini bildirib.
S.Babayeva vurğulayıb ki, respublikamızın əksər rayonlarında icra hakimiyyəti başçılarının müavinləri qadınlardır. Həmçinin dövlət qulluğunda çalışanlar arasında qadınların xüsusi çəkisi 30 faizə, sahibkarlıq fəaliyyətində isə 35 faizə çatıb.
KOBİA-nın İdarə Heyətinin sədri Orxan Məmmədov iqtisadiyyatda və məşğulluqda qadın sahibkarların rolu, eləcə də, agentliyin biznes subyektlərinə göstərdiyi dəstək və xidmətlər barədə danışıb.
Qeyd edilib ki, hazırda həm qlobal səviyyədə, həm də ölkəmizdə qadınlar kiçik biznes yaratmağa və özünüməşğulluğa getdikcə daha çox maraq göstərirlər. Statistikaya əsasən, ölkəmizdə qeydiyyata alınmış fərdi sahibkarların 22 faizini qadınlar təşkil edir. Onların arasında kənd təsərrüfatı, ticarət və digər sahələrdə fəaliyyət göstərən qadınlar üstünlük təşkil edir.
Qadınlar biznes fəaliyyətinə başlamaq və sahibkarlıq fəaliyyətini genişləndirmək üçün KOBİA-nın təlim, məsləhət, beynəlxalq ixtisasartırma, maliyyə resurslarına və satış bazarlarına çıxış, qrant, daxili bazar araşdırması, “Startap” şəhadətnaməsi və digər dəstək və xidmətlərindən faydalanırlar. Eyni zamanda, qadınların sahibkarlıq sahəsində yeniliklər, dəstək mexanizmləri barədə məlumatlandırılması, onların fikir və təkliflərinin öyrənilməsi üçün mütəmadi olaraq agentlik tərəfindən maarifləndirici tədbirlər təşkil olunur.
Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili qadınların iqtisadiyyatda rolunu yüksək qiymətləndirərək bildirib ki, 44 günlük Vətən müharibəsində Azərbaycan qadınının şücaəti təqdirəlayiqdir.
Milli Məclisin Ailə, qadın və uşaq məsələləri komitəsinin sədri Hicran Hüseynova, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev və Azərbaycanda Qadın Sahibkarlığının İnkişafı Assosiasiyasının İdarə Heyətinin üzvü Zərifə Quliyeva ölkəmizin ictimai-siyasi, sosial-iqtisadi həyatında qadınların rolu, Ulu Öndər Heydər Əliyevin cəmiyyətdə qadının rolunun yüksəldilməsinə və qadın sahibkarlığının inkişafına göstərdiyi diqqət barədə fikirlərini bölüşüblər.
Tədbirin sonunda bir qrup qadın sahibkar AQSİA tərəfindən mükafatlandırılıb.
Bölmənin digər xəbərləri
