İRAN VƏ AZƏRBAYCAN ENERGETİKLƏRİNİN ƏMƏKDAŞLIĞI İNKİŞAF EDİR

10.10.2003 [16:56]
Çap et
A⁺ A^-

Azərbaycan və İranın milli elektroenergetika təşkilatları - “Azərenerji” ASC və “Tavanir” şirkəti enerji sistemlərinin dispetçer idarəolunmasının vacib sahəsi olan rabitə və dispetçer texnoloji idarəetmə vasitələrinin inkişafı sahəsində müvafiq tədbirlər həyata keçirirlər.

“Azərenerji”nin mətbuat xidmətindən AZƏRTAC-a bildirmişlər ki, artıq 330 kilovoltluq İmişli və 230 kilovoltluq Parsabad yardımçı stansiyaları arasında yüksəktezlikli rabitə kanalı fəaliyyətdədir. Növbəti mərhələdə həmin rabitə kanalının “Azərenerji” ASC və “Tavanir” şirkətinin Azərbaycan Regional Elektrik Şirkətinin dispetçer məntəqələri arasında yaradılması nəzərdə tutulur. Onun işə salınması və daha da genişlənməsi hər iki enerji sisteminin dispetçer idarəolunmasının operativ şəkildə və keyfiyyətlə yerinə yetirilməsinə imkan yaradacaqdır.

Hazırda Astara (Azərbaycan) və Astara (İran) yardımçı stansiyaları arasında yüksəktezlikli rabitə kanalının yaradılması gündəlikdədir.