İran XİN Avropa ölkələri ilə danışıqlar aparılacağını təsdiqləyib
Bakı, 19 iyun, AZƏRTAC
İranın xarici işlər naziri Abbas Ərağçi Avropanın üç ölkəsindən olan həmkarları ilə iyunun 20-də Cenevrədə danışıqlar aparacağını təsdiqləyib.
AZƏRTAC xəbər verir ki, bu barədə IRNA agentliyi məlumat yayıb. “Biz cümə günü Cenevrədə Avropa nümayəndə heyəti ilə görüşəcəyik”, - deyə iranlı nazir bildirib.
Onun sözlərinə görə, danışıqlar Almaniya, Fransa və Böyük Britaniyanın xarici işlər nazirləri İohan Vadeful, Jan-Noel Barro və Devid Lamminin iştirakı ilə keçiriləcək. Ərağçi qeyd edib ki, danışıqlarda Avropa Komissiyasının nümayəndəsi Kaya Kallas da iştirak edəcək.
Bundan əvvəl “Reuters” agentliyi belə bir görüş barədə məlumat vermiş və danışıqların nüvə məsələsinə aid olacağını bildirmişdi.
Bölmənin digər xəbərləri
