İspaniya koronavirusun ehtimal olunan payız dalğasına hazırlaşır
Madrid, 12 iyun, AZƏRTAC
İspaniya uzunmüddətli karantindən sonra normal həyata qayıdır.
AZƏRTAC xəbər verir ki, İspaniya hökuməti ölkə sakinləri üçün karantindən sonrakı yaşam qaydalarını hazırlayıb. İyunun 21-də başlanması nəzərdə tutulan həmin müddət koronavirusa qarşı vaksin tapılana qədər davam edəcək. Mütəxəssislər yayda yoluxmanın artacağını mümkün saysalar da, vəziyyətin nəzarətdə olduğunu bildirirlər. Koronavirusun ikinci dalğasının payıza təsadüf ediləcəyi və onun qrip dalğası ilə üst-üstə düşəcəyi ehtimal olunur.
Bu səbəbdən İspaniyanın Səhiyyə Nazirliyi və Muxtar İcmalar riskləri azaltmağa çalışır və növbəti dəfə səhiyyə sistemini gücləndirirlər. Qrip əleyhinə kampaniyaya mümkün qədər tez, oktyabrın ilk həftələrində başlamaq nəzərdə tutulur. Bu məqsədlə qripə qarşı kifayət qədər vaksin alınması planlaşdırılır. Səhiyyə Nazirliyi hazırlıq kampaniyası çərçivəsində muxtar qurumlar üçün dörd milyon dozalıq vaksin almağı öhdəsinə götürüb.
Payızda qripə qarşı peyvənd tibb işçilərinin 75 faizini, habelə əhalinin ən həssas təbəqələrini, o cümlədən 65 yaşdan yuxarı olan insanları, hamilə qadınları və başqalarını əhatə edəcək.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
