DÜNYA
İspaniyada daşqınlardan sonra 89 nəfər hələ də itkin düşmüş sayılır
Bakı, 7 noyabr, AZƏRTAC
İspaniyanın şərqində on gün əvvəl baş vermiş dağıdıcı daşqınlar nəticəsində ölənlərin sayı 217 nəfərə çatıb, daha 89 nəfər hələ də itkin düşmüş sayılır.
AZƏRTAC Sinxua agentliyinə istinadla xəbər verir ki, bu rəqəmlər Vahid Məlumat Mərkəzinin çərşənbə günü dərc etdiyi məlumatda yer alıb. Valensiya bölgəsində 211, qonşu Kastiliya-La-Mança əyalətində 5, Əndəlusda isə bir nəfərin həyatını itirdiyi bildirilir.
İspaniya hökumətinin məlumatına görə, hazırda təbii fəlakətdən zərər çəkmiş ərazilərdə 7987 hərbçi, 12 helikopter və 18 qayıq da daxil olmaqla, 1639 texnika işləyir. Xilasetmə qüvvələrinə İspaniya Milli Polisinin və Mülki Qvardiyasının 5000-ə yaxın əməkdaşı, o cümlədən digər bölgələrdən olan yanğınsöndürmə briqadaları kömək edirlər.
Hazırda Avropa İnvestisiya Bankı və İspaniya hökuməti regiona əlavə yardım paketləri üzərində işləyir.
