İsveç və Rusiya istisna olmaqla, Finlandiya qonşu ölkələrlə ilə sərhədləri açır
Stokholm, 12 iyun, AZƏRTAC
İsveç və Rusiya istisna olmaqla, Finlandiya qonşu ölkələrin çoxu ilə sərhədləri açır.
AZƏRTAC xəbər verir ki, Finlandiya hökuməti qonşu ölkələrə səyahət məhdudiyyətlərini aradan qaldırmaq qərarına gəlib. İyunun 15-dən başlayaraq Norveç, Danimarka, Estoniya, İslandiya, Latviya və Litva ilə hava və müntəzəm bərə vasitəsilə daşımalarda daxili sərhəd nəzarətindən imtina olunacaq.
Finlandiyanın Daxili İşlər naziri Mariya Oxisalo jurnalistlərə bildirib ki, hökumət COVID-19 pandemiyası ilə bağlı İsveç və Rusiyaya münasibətdə məhdudiyyətləri hələlik yumşaltmayacaq. Nazir onu da qeyd edib ki, hökumət qərarın dəyişdirilməsinə lüzum olub-olmadığını müəyyənləşdirmək üçün bu məsələni iki həftə sonra yenidən nəzərdən keçirəcək.
Finlandiya bu yay mövsümündə İsveç turistlərinə qadağa qoyan yeganə ölkə deyil. Bundan əvvəl Danimarka, Norveç və Niderland hökumətləri də İsveçdə koronavirusla bağlı vəziyyətin gərgin olmasını əsas gətirərək isveçli turistlərə münasibətdə analoji mövqe tutublar.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
