İTALİYA AZƏRBAYCANLA ƏLAQƏLƏRİN İNKİŞAFINDA MARAQLIDIR
Parlamentin sədri ölkələrimiz arasındakı dostluq əlaqələrinin tarixindən danışmış və bu əlaqələrin inkişafında dövlətlərimizin başçılarının rolunu xüsusi vurğulamışdır. Bildirmişdir ki, ümummilli lider Heydər Əliyevin 1997-ci ildə İtaliyaya rəsmi səfəri zamanı aparılmış danışıqlar və imzalanmış çoxsaylı sənədlər əlaqələrimizin inkişafı üçün hüquqi baza yaratmışdır. Azərbaycan Prezidenti İlham Əliyevin 2005-ci ildə İtaliyaya səfərindən sonra isə münasibətlərimizin hərtərəfli inkişafında yeni mərhələ yaranmışdır. Həmin səfər ərəfəsində keçirilmiş biznes forumu iqtisadi əlaqələrin inkişafı üçün geniş imkanlar açmışdır. Hazırda Azərbaycanda 40-a yaxın italyan şirkəti fəaliyyət göstərir, qarşılıqlı ticarət dövriyyəsi 1 milyard dolları ötmüşdür.
Milli Məclisin sədri demişdir ki, parlamentlərimiz də yaranmış imkandan istifadə edərək, əlaqələrin daha da genişlənməsinə çalışmalıdır. Milli Məclisdə İtaliya parlamenti ilə dostluq qrupu vardır. Ümid edirik ki, bu ilin aprel ayında İtaliyada keçiriləcək parlament seçkilərindən sonra əlaqələrimiz daha da genişlənəcəkdir.
Cənab Roberto Kastelli bildirmişdir ki, İtaliya Azərbaycanla əlaqələrin hərtərəfli inkişafında maraqlıdır. Bakıya səfərin əsas məqsədi də ölkələrimiz arasında münasibətləri yeni mərhələyə qaldırmaqdır. Səfər zamanı imzalanacaq sənəd işgüzar münasibətlərin inkişafında mühüm rol oynayacaqdır. Parlamentlərarası əlaqələrin yüksək səviyyəyə çatdırılması üçün də bütün imkanlar vardır.
Görüşdə qarşılıqlı maraq doğuran məsələlər ətrafında geniş fikir mübadiləsi aparılmışdır.
Bölmənin digər xəbərləri
