İXTİSASLAŞDIRILMIŞ UŞAQ-GƏNCLƏR FUTBOL MƏKTƏBİNİN 25 YAŞI TAMAM OLUR
Bakı, 23 iyun (AZƏRTAC). Bakı Şəhər Gənclər və İdman Baş İdarəsinin ixtisaslaşdırılmış uşaq-gənclər futbol məktəbi 25 yaşını qeyd edir. 1984-cü ildə yaradılan məktəbdə milli yığmamızın, SSRİ gənclər yığmasının, müxtəlif klubların, ilk növbədə, Azərbaycan futbolunun flaqmanı “Neftçi” komandasının gələcək oyunçuları ilk addımlarını atmışlar.
Bakı Şəhər Gənclər və İdman Baş İdarəsinin rəisi Raqif Abbasov yubiley tədbirində çıxış edərək bildirmişdir ki, bu məktəb uşaqları böyük futbola peşəkar səviyyədə hazırlayan ilk təlim müəssisələrindən biri olmuşdur. Cabaxış Hüseynov, Böyükağa Abbasov, Zaur Tağızadə, Vladimir Kovalyov, İlham Yədullayev, Tərlan Əhmədov, Vüqar İsmayılov, Elçin Rəhmanov bu məktəbin yetirmələridir.
Məktəbin yetirmələri daim ölkə rəhbərliyinin diqqət və qayğısını hiss etmişlər. Hazırda burada 12-18 yaşlarında 800-dən çox uşaq 4 yaş qrupunda təlim və məşq keçir.
Azərbaycan Milli Olimpiya Komitəsinin vitse-prezidenti Xəzər İsayev, Azərbaycan futbolunun veteranı Ələkbər Məmmədov məktəbin kollektivini təbrik etmiş və ümidvar olduqlarını bildirmişlər ki, məktəbin yetirmələri bundan sonra da yığmamızın və Azərbaycan klublarının şərəfini layiqincə qoruyacaqlar.
Sonra futbol veteranları və müxtəlif illərdə məktəbin yetirmələri olmuş futbolçular arasında oyun keçirilmişdir.
Bölmənin digər xəbərləri
