Karantin qaydalarına əməl etmək hər birimizin borcudur
Bakı, 15 aprel, AZƏRTAC
Bəşəriyyət bir neçə aydır ki, gözə görünməyən və qorxulu infeksiya ilə mübarizə aparır. Bir aya yaxındır ki, ölkəmizdə də dünyanı dolaşan koronavirus (COVID-19) virusuna qarşı hərtərəfli mübarizə gedir.
Bakı 2 nömrəli Tibb Kollecində Yeni Azərbaycan Partiyası ərazi təşkilatının sədri, həkim-pediatr Gülər Quluzadə AZƏRTAC-ın müxbiri ilə telefon söhbətində təhlükəli epidemiyanın miqyasının genişlənməməsi və yayılmaması üçün ölkəmizdə tətbiq edilən xüsusi karantin rejimi şəraitindəki həyat tərzi haqqında məlumat verib: “Əsas nigaranlığım böyük oğlum Məhəmmədkərimlə əlaqədardır. O, hazırda Almaniyada olduğundan hər gün onunla telefonla danışır, hal-əhval tuturuq. İkinci oğlum Əlihüseyn reklam agentliyində işləyir, hər səhər maska və əlcək taxaraq işə gedir. Digər iki oğlum Maqsudxan və Nəcməddin idmanla məşğul olurlar və evdə məşğul olmaq onları darıxdırır. Kiçik oğlum Əmirxan isə orta məktəbin səkkizinci sinfində oxuyur, onlayn dərslərdə iştirak edir. Onun dərsdən kənarda qalmamasına ciddi nəzarət edir, hazırlığı ilə maraqlanıram.
Demək olar ki, evdən heç yerə çıxmıram. Hər həftə kollecin mamalıq işi şöbəsinin birinci kursunun tələbələrinə onlayn qaydada dərs keçirəm. Bu həftə sinir sistemi və baş-beyin şöbələri haqqında tələbələrə mühazirə oxumuşam, videodərs göndərmişəm. Anatomiyadan növbəti dərsim baş-beyin və onurğa beyninin şöbələri haqqında olacaq. Əlbəttə ki, işim yalnız bununla bitmir. Kollecdə qiymətləndirmə və monitorinq şöbəsinin rəhbəriyəm. Şöbənin bir sıra sənədləri üzərində müəyyən səliqə-sahman işləri aparır, kəm-kəsirləri qaydaya salıram”.
Gülər xanım evdə keçirdiyi günlərdə heç də darıxmadığı, ailə-məişət qayğılarının kifayət qədər çoxluğu barədə də danışıb: “Vaxtımın çoxu mətbəxdə keçir. Son günlər çörəyi evdə bişirirəm. Xüsusilə bişirdiyim ən müxtəlif xəmir xörəkləri ailə üzvlərimizin ağzını dada gətirir. Çoxlu yeni kulinariya nümunələri hazırlayıram, uşaqlara xoş gəldikcə daha da həvəslənirəm. Televizorda milli filmləri izləməkdən zövq alıram. Karantin günlərində xeyli kitab oxumuşam “Qurani-Kərim” stolüstü kitabımdır. Vaxtaşırı digər dini kitabları da vərəqləyirəm. F.Dostoyevskinin “İdiot”, M. Qorkinin “Həyatın dibində” kitablarını təzəcə oxuyub başa çatdırmışam. Son günlər Elxan Elatlının “Məhəbbətin gizli kodu” kitabını da mütaliə etmişəm”.
“Gün ərzində bir neçə dəfə dünyanın müxtəlif televiziyalarında verilən xəbər proqramlarında koronavirus pandemiyası ilə həkimlərin apardığı ölüm-dirim mübarizəsini saatbasaat izləyirəm. Belə bir qorxunc və ölümsaçan virusla üzləşmək bütün bəşəriyyətin faciəsidir. Nə qədər tez və nə qədər minimal itkilərlə ondan yaxa qurtara bilsək, o qədər yaxşı olar. Ancaq mən onu bilirəm ki, bu, uzun müddət davam edə bilməz. Koronavirus bəşəriyyətin üzləşdiyi birinci pandemiya deyil. Gec-tez, əvvəl-axır ondan da xilas yolu tapılacaq və həyat öz axarı ilə davam edəcək. Ancaq indiki mərhələdə biz insanlardan da asılı olan məsələlər var. Bu, ilk növbədə, evdən bayıra çıxmamaqdan, təmasdan uzaq durmaqdan, gigiyenik qaydalara əməl etmək və immuniteti artırmaqdan ibarətdir. Həmin qaydalara əməl etmək isə bir vətəndaş kimi hər birimizin borcudur”,- deyə G.Quluzadə fikrini yekunlaşdırıb.
Bölmənin digər xəbərləri
