Kimya elminin perspektiv istiqamətləri üzrə əməkdaşlığa dair müzakirə aparılıb
Bakı, 24 may, AZƏRTAC
Elm və Təhsil Nazirliyinin akademik Əli Quliyev adına Aşqarlar Kimyası İnstitutunda (AKİ) dövlət universitetlərinin kimya və kimya mühəndisliyi üzrə ixtisaslaşmış fakültə və kafedra rəhbərləri ilə “Kimya elminin perspektiv istiqamətləri üzrə əməkdaşlığın genişləndirilməsi” mövzusunda tədbir keçirilib.
İnstitutdan AZƏRTAC-a bildirilib ki, tədbirdə Bakı Dövlət Universiteti, Bakı Mühəndislik Universiteti (BMU), Azərbaycan Dövlət Neft və Sənaye Universiteti (ADNSU), Azərbaycan Tibb Universiteti (ATU), Azərbaycan Dövlət Pedaqoji Universiteti (ADPU), Sumqayıt Dövlət Universiteti (SDU) və Azərbaycan Texniki Universitetindən (ATU) nümayəndələr iştirak ediblər.
Tədbiri açan institutun baş direktoru, akademik Vaqif Fərzəliyev bildirib ki, görüşün məqsədi elmlə təhsilin inteqrasiyasının daha da güclənməsi üçün kimya və kimya mühəndisliyinin prioritet istiqamətləri üzrə mövcud əlaqələrin daha da genişləndirilməsi, müştərək fundamental-tətbiqi elmi tədqiqatların aparılması, kadr hazırlığı, elmi-pedaqoji fəaliyyət, birgə elmi rəhbərlik, təcrübə mübadiləsi, elmi seminarların təşkili və sair istiqamətlərdə əməkdaşlıq məsələlərini müzakirə etmək, yaxın gələcək üçün yol xəritəsini müəyyənləşdirməkdir.
Rəhbərlik etdiyi elmi müəssisənin fəaliyyət istiqamətləri, nailiyyətləri, beynəlxalq əməkdaşlıq əlaqələri haqqında məlumat verən V.Fərzəliyev qeyd edib ki, indiyə qədər BDU, ATU, BMU ilə müştərək olaraq zərif üzvi sintezin və kompüter modelləşməsinin imkanlarından istifadə etməklə yüksək təsirə malik fizioloji fəal birləşmələrin, o cümlədən dərman maddələrinin, müxtəlif təyinatlı üzvi reagentlərin məqsədli sintezi və funksional təsir mexanizminin öyrənilməsi istiqamətində aparılmış müfəssəl tədqiqatların nəticələri dünyanın nüfuzlu jurnallarında dərc olunub. Akademik hazırda institutda BDU-nun baza kafedrasının fəaliyyət göstərdiyini, orada tələbə və magistrantların elmi-istehsalat təcrübəsi keçdiyini, laboratoriyalarda tədqiqat işləri ilə məşğul olduğunu vurğulayıb. V.Fərzəliyev ATU ilə növbəti mərhələdə işğaldan azad olunmuş Qarabağ və Şərqi Zəngəzur iqtisadi rayonlarının flora örtüyündən toplanacaq dərman bitkilərinin ekstraktları üzrə birgə tədqiqatların aparılmasının nəzərdə tutulduğunu qeyd edib.
Akademikin sözlərinə görə, ayrı-ayrı universitetlərin kimya ixtisası üzrə tələbələri fərdi və qrup halında AKİ-nin müasir cihaz və avadanlıqlarla təchiz edilmiş laboratoriyalarında təcrübə keçib, diplom və kurs işlərinin təcrübi hissələrini yerinə yetirib. İnstitutla BDU-nun Kimya fakültəsi arasında müştərək elmi əməkdaşlıq çərçivəsində 2023-2024-cü tədris ili üzrə keçiriləcək birgə elmi seminarların planı təsdiq edilib. Bu ilin sentyabr ayından başlayaraq qarşılıqlı formada aparıcı alimlərin təqdimatında elmi seminarlar təşkil olunacaq. V.Fərzəliyev belə tədbirlərin Azərbaycan elminə böyük töhfələr verə biləcəyinə inandığını qeyd edib.
Daha sonra Bakı Dövlət Universitetinin Üzvi kimya kafedrasının müdiri, akademik Abel Məhərrəmov görüşün aktuallığından, ölkəmizdə mövcud olmuş elmi məktəblərin daha da inkişaf etdirilməsi yollarından, eləcə də kadr hazırlığı, birgə tədqiqat mərkəzləri yaratmaq, laboratoriyaların müasir cihaz və reaktivlə təchizi məsələsində olan problemlər və onların həlli yolları ilə əlaqədar təkliflərini səsləndirib.
Bakı Dövlət Universitetinin kimya fakültəsinin dekanı, kimya üzrə fəlsəfə doktoru dosent Fuad Kərimli universitetin AKİ ilə əlaqələrindən, kimya elminin perspektiv istiqamətlərindən, qarşıda duran prioritet məsələlərdən danışıb.
Azərbaycan Tibb Universitetinin Ümumi və toksikoloji kimya kafedrasının müdiri Eldar Qarayev universitetdə apardıqları elmi-tədqiqat işlərindən və bu işlərin aparılmasında kompüter texnologiyasından istifadə edərək dərman dizaynı və biokimya sahəsində əldə etdikləri uğurlardan danışıb, bu istiqamətlərdə birgə əməkdaşlığın mümkünlüyünü diqqətə çatdırıb.
BDU-nun Ekoloji kimya kafedrasının müdiri kimya elmləri doktoru professor Sevinc Hacıyeva rəhbərlik etdiyi kafedranın yaranmasından, tətbiq sahələrindən, ətraf mühitdə kimyəvi proseslərin canlı orqanizmlərə təsirindən və bu problemlərin aradan qaldırılması üçün həyata keçirilə biləcək müştərək tədqiqat işlərindən danışıb.
Daha sonra tədbir iştirakçıları qarşılıqlı əlaqələrin əhəmiyyətindən, əməkdaşlığın genişləndirilməsi yollarından, kimya sahəsində olan problemlərdən danışıblar və təkliflərini diqqətə çatdırıblar.
Bölmənin digər xəbərləri
