“Kitabi-Dədə Qorqud” və “Beovulf” dastanlarının birgə öyrənilməsi təklifi müsbət qarşılanıb
Bakı, 21 oktyabr, AZƏRTAC
İnanıram ki, bizim tələbələr və müəllimlər sizin kimi öz sahəsinin nüfuzlu alimlərindən bir çox vacib bilgilər alıblar. Əlbəttə, bu, tələbələrin mütəxəssis kimi formalaşmasına, müəllimlərin isə öz sahəsində daha da təkmilləşməsinə öz müsbət təsirini göstərəcək. Azərbaycan Dillər Universiteti geniş beynəlxalq əlaqələri olan ali təhsil ocağıdır. Bizim universitetdə 20 ölkənin dil və mədəniyyət mərkəzi fəaliyyət göstərir. Ümid edirəm, sizin çalışdığınız Alabama Universiteti ilə də əməkdaşlığımız gələcəkdə daha sıx şəkildə davam edəcək, qarşılıqlı layihələrimizdən tələbələrimiz və müəllimlərimiz faydalana biləcəklər.
Azərbaycan Dillər Universitetindən (ADU) AZƏRTAC-a bildirilib ki, bu sözləri rektor Kamal Abdulla ABŞ-ın Alabama Universitetinin professorları Cozef Vud və Ann Bax ilə görüşündə deyib.
Akademik Kamal Abdulla qonaqlara “Kitabi-Dədə Qorqud” və “Beovulf” dastanlarının müqayisəli tədqiqi layihəsini birgə həyata keçirməyi təklif edib. Rektor bildirib ki, bu, ADU-nun və Alabama-Birmingen Universitetinin alimləri üçün yeni elmi perspektivlər açacaq.
Professorlar Cozef Vud və Ann Bax ADU-da tələbə və müəllimlərlə görüşdən məmnun olduqlarını bildiriblər. Universitetdən xoş təəssüratla ayrıldıqlarını deyən alimlər “Kitabi-Dədə Qorqud” və “Beovulf” dastanlarının birgə öyrənilməsi təklifini müsbət qarşılayıb, təmsil etdikləri universitetdə bununla bağlı məsələ qaldıracaqlarını söyləyiblər.
Görüşdə ədəbiyyatşünaslıq və linqvistikanın perspektivləri, tərcümə sənəti ilə bağlı müzakirələr aparılıb.
Bölmənin digər xəbərləri
