Könül Nurullayeva: Kəlbəcərin azad edilməsi Azərbaycan Prezidentinin cəsarətli, prinsipial və düşünülmüş siyasətinin nəticəsidir
Bakı, 2 aprel, AZƏRTAC
2020-ci il Vətən müharibəsindən sonra təqvimimizin işğal tarixlərini qələbə günləri əvəzlədi. Biz Böyük Qələbəyə qədər 2 apreli Kəlbəcərin işğal günü kimi qeyd edirdik. Kəlbəcərin geri qaytarılması güclü Azərbaycan dövlətinin, dünyanın 50 ən güclü ordusundan birinin iradəsi hesabına mümkün oldu. Prezident İlham Əliyevin cəsarətli, prinsipial və düşünülmüş siyasətinin nəticəsidir ki, bu gün Kəlbəcər azaddır.
Bunu AZƏRTAC-a açıqlamasında Milli Məclisin deputatı Könül Nurullayeva deyib.
1993-cü ilin bu günü, yəni, aprelin 2-də Kəlbəcər rayonunun Ermənistan ordusu tərəfindən işğal edildiyini xatırladan deputat bildirib: “Təəssüf ki, işğal nəticəsində 511 nəfər həlak olmuş, 321 nəfər itkin düşmüş və ya girov götürülmüş, rayona 761 milyon ABŞ dolları məbləğində ziyan dəymişdi. Ən dəhşətlisi isə budur ki, ermənilər Kəlbəcərdə mülki əhaliyə qarşı xüsusi qəddarlıq tətbiq etmişdilər. İnsanlar amansızcasına qətlə yetirilmişdi. İşğal dövründə düşmən Kəlbəcərdə bütün infrastrukturu, yaşayış yerlərini dağıdıb, mədəniyyət və dini abidələri məhv edib, ekoloji terror həyata keçirib. Azərbaycan xalqına məxsus sərvətləri talan edib. Yəni, heç zaman ermənilərə aidiyyəti olmayan Kəlbəcər bu müddət ərzində terrorun demək olar ki, bütün növlərinə məruz qalıb”.
K.Nurullayeva qeyd edib ki, Kəlbəcərin işğalından sonra BMT Təhlükəsizlik Şurası 822 saylı qətnamə qəbul edib. Qətnamə Ermənistan silahlı qüvvələrinin Azərbaycanın tarixi ərazisi olan Kəlbəcər rayonunu işğal etməsindən sonra 1993-cü il aprelin 30-da qəbul olunmuşdu. Qətnamədə bütün işğalçı qüvvələrin Kəlbəcər və Azərbaycanın işğal olunmuş digər rayonlarından dərhal çıxarılması tələb edilirdi. Lakin 27 il ərzində bu sənədin icrası ilə bağlı mexanizm işləmədi. Nəhayət, Azərbaycan öz gücü hesabına, təkbaşına bu qətnamənin icrasına nail oldu, ərazi bütövlüyünü bərpa etdi, Kəlbəcər tarixi sahiblərinə qaytarıldı. Lakin ermənilər öz xislətlərini bu müddətdə də gizlədə bilmədilər.
Deputat təəssüflə bildirib ki, Kəlbəcəri tərk edən zaman azərbaycanlılara daha böyük ziyan vurmaq üçün ermənilər əraziləri, mülki obyektləri yenidən minaladılar, evləri, meşələri yandırdılar. Bütün dünya ermənilərin əsl vandal simasını gördü. Bu gün Ermənistanda da etiraf edirlər ki, Kəlbəcərin bu ölkəyə heç vaxt aidiyyəti olmayıb. İşğalçı ölkədə fikirlər belə idi ki, Kəlbəcər tarixi Azərbaycan torpağıdır, ona görə də gec-tez Azərbaycana qaytarılmalı idi.
“Biz 44 günlük Vətən müharibəsi nəticəsində nəinki Kəlbəcəri, işğal altında olan digər ərazilərimizi də azad etdik”, - deyə deputat qeyd edib.
Bölmənin digər xəbərləri
