KOREYA RESPUBLİKASININ PREZİDENTİ RO MU HYUNUN BƏYANATI
-İlk növbədə mən, bizə və nümayəndə heyətimə göstərilmiş yüksək qonaqpərvərliyə görə cənab Prezidentə, sizin xalqınıza və hökumətin üzvlərinə dərin minnətdarlığımı bildirmək istəyirəm.
Biz buraya səfər etməzdən əvvəl Azərbaycan haqqında məlumatımız çox az idi. Lakin cənab Prezidentlə apardığımız danışıqlardan sonra biz gördük ki, burada ikitərəfli münasibətlər üçün imkanlar gözlədiyimizdən daha çoxdur. İndi isə Azərbaycan haqqında təəssüratlarımı Sizinlə bölüşmək istəyirəm.
Ümumiyyətlə, demək istəyirəm ki, Azərbaycanı xoşbəxt ölkə hesab edirəm. Çünki Azərbaycanın bu gün inkişaf üçün çox böyük imkanları vardır. Azərbaycan öz neft və qaz yataqlarından səmərəli istifadə etmək baxımından çox önəmli, mühüm bir coğrafi məkanda yerləşir. Lakin ölkənin bütün sahələrində uğurun qazanılması üçün təkcə bu amillər kifayət deyildir. Eyni zamanda, xalqın birliyi və onun müdrik rəhbərlik tərəfindən idarə olunması vacib hesab edilir.
Biz bilirik ki, Azərbaycanın özü böyük əziyyətlər çəkmiş və çətinliklərdən keçmişdir. Lakin, eyni zamanda, biz qeyd etmək istəyirik ki, Azərbaycan qonşu ölkənin ucbatından müəyyən əziyyətlər çəkmişdir. Ancaq Azərbaycan 1990-cı illərdə qazandığı müstəqilliyi itirməmişdir və bu müstəqilliyin qorunub saxlanmasında məhz Azərbaycanın böyük liderinin rolu var idi. Azərbaycan xalqı həmin böyük liderə inamla, onun addımlarını dəstəkləyərək, özünün möhkəm cəmiyyətini və inkişaf edən iqtisadiyyatını qurmağa nail olmuşdur.
İndi isə biz özümüz üçün Azərbaycan tarixinin növbəti səhifəsini açırıq. Mən Azərbaycana dəvət edildikdən, rəsmi səfərə başladıqdan sonra Azərbaycanın ümummilli lideri Heydər Əliyevin bu ölkə üçün gördüyü işləri öz gözümlə bir daha görmək imkanına nail oldum. Onun gördüyü işlərə, onun sayəsində əldə olunmuş nailiyyətlərə rəğbətlə yanaşıram.
Prezident İlham Əliyevlə apardığım danışıqlara gəldikdə isə, mən Azərbaycanın parlaq gələcəyi ilə bağlı onun fikirlərinə daha da əmin oldum. Azərbaycanın tarixi nailiyyətlərini nəzərə alaraq, bir daha şahidi oldum ki, ölkənizlə əməkdaşlıq sahəsində çox böyük imkanlara malik ola bilərik. Əminəm ki, biz bundan sonra bu imkanlardan istifadə edəcəyik.
Azərbaycandan söhbət gedəndə, hamı ilk növbədə, neft sektoru haqqında düşünür. Lakin Prezident Əliyevlə danışıqlarımız zamanı o, Azərbaycan iqtisadiyyatının digər sahələrində də iri layihələrin başlanmasına xüsusi marağını vurğuladı. Prezident Əliyev xüsusilə infrastruktur, tikinti, yolların çəkilməsi, hava, dəniz limanlarının tikilməsi və digər vacib layihələr haqqında söhbət açdı. Bunları nəzərə alaraq, hesab edirəm ki, Koreya Respublikasının iş adamları, işgüzar dairələri bu imkanlardan tam istifadə etməlidirlər. Düşünürəm ki, onlar qeyri-neft sektorundakı məhz həmin sahələrə xüsusi diqqət yetirməlidirlər. Sadaladığım bütün sahələrdə əməkdaşlıq baş tutarsa, bizim işgüzar dairələr Azərbaycan tərəfini heç vaxt məyus etməyəcəklər. Mən sizi inandıra bilərəm ki, bütün bu sahələrdə konkret işlərin görülməsi üçün bizim kifayət qədər imkanlarımız var.
Ölkəmizin bu yaxınlardakı tarixinə əgər nəzər salsaq, görərik ki, inkişaf, ümumiyyətlə yox idi. İllər keçdikcə, Koreya bu inkişaf sürətinə, nailiyyətinə nail ola bildi və dünyanın digər aparıcı ölkələri ilə bir cərgəyə qoşuldu. Eyni zamanda, bizim təcrübəmizin xüsusiyyətini də qeyd etmək istəyirəm. Digər ölkələr, bəlkə də, özlərinin təbii sərvətlərinə, ehtiyatlarına arxalanaraq inkişafa tez nail ola bildilər. Amma bizim bu cür imkanlarımız yox idi, demək olar, heç nədən, bu cür böyük inkişafa nail ola bildik. Hesab edirəm ki, bizim təcrübəmiz məhz bu baxımdan vacibdir. Hər hansı bir özəl müəssisənin inkişaf etdirilməsi bizim üçün ən vacib məsələdir. Bu sahədə ən təcrübəli insanlar məhz həmin məsələyə xüsusi diqqət yetirməlidirlər.
Azərbaycanın iqlimi Koreyadakı iqlimə oxşardır. Burada baxıram, seyr edirəm, ağaclar Koreyadakı ağaclara oxşardır. Hətta dəniz də anadan olduğum doğma şəhərin yanındakı dənizə oxşardır. Ona görə əminəm ki, Koreya xalqının nümayəndələri, hər hansı bir koreyalı Azərbaycana gəlsə, bundan çox xoşbəxt olacaqdır. Baxmayaraq, ölkələrimiz arasında bu günə qədər aparılmış əmtəə mübadiləsinin səviyyəsi o qədər böyük olmamışdır, amma hesab edirəm ki, real potensial və imkanlar qat-qat yüksəkdir, bundan istifadə edilməlidir.
Digər ölkələrlə müqayisədə, xalqımız indiki inkişaf səviyyəsinə daha tez çatmışdır. Azərbaycana səfər edən koreyalıların sayı bu günə qədər çox olmamışdır. Lakin hesab edirəm, bundan sonra qarşılıqlı səfərlərin sayı artacaqdır. Əgər belə səfərlər baş tutarsa, iki ölkənin xalqları bir-birinə daha da yaxınlaşacaqdır. Əminəm ki, Azərbaycanda olan koreyalıların sayı çoxalacaqdır.
Məni müşayiət edən çoxsaylı nazirlər və eyni zamanda, işgüzar dairələrin nümayəndələri Azərbaycana bu səfərimə xüsusi maraqla yanaşırlar. Onlar məni əmin etdilər ki, bundan sonra Azərbaycan həmkarları ilə işbirliyi qurmaq üçün real imkanlardan istifadə edəcəklər. Ona görə, hesab edirəm ki, ikitərəfli əməkdaşlığımız gələcəkdə konkret forma alacaqdır.
Azərbaycan hökuməti Seulda səfirliyinin təsis olunması ilə bağlı qərar qəbul etmişdir. Bu yaxınlarda səfirlik fəaliyyətə başlayacaqdır. Biz öz tərəfimizdən sizi əmin etmək istəyirik ki, Koreya Respublikasının Azərbaycandakı səfirliyi də artıq cari ildə fəaliyyətə başlayacaqdır.
Prezident Əliyevlə görüşüm zamanı onu ölkəmizə rəsmi səfərə dəvət etdim. Onun bu səfəri ikitərəfli münasibətlərimizin daha da inkişafına və iqtisadi əməkdaşlığımızın daha da genişləndirilməsinə xidmət edəcəkdir.
Cənab Prezident, Siz bugünkü görüşdə mənim dəvətimə cavab vermədiniz. İndi isə xahiş edirəm, cavab verəsiniz.
İLHAM ƏLİYEV: Mən böyük məmnuniyyətlə Sizin ölkəyə səfər edəcəyəm və biz bu gözəl dialoqu Koreyada davam etdirəcəyik. Dəvətə görə çox sağ olun.
Bölmənin digər xəbərləri
