Kuba əhalisi dünyada ən çox peyvənd olunan ölkələrdən biridir
Madrid, 15 noyabr, AZƏRTAC
Oksford Universitetinin “Dünya statistik məlumatlarda” (Our World in Data) adlı onlayn elmi nəşrinin son hesablamalarına görə, kubalıların 88,74 faizi COVID-19 əleyhinə ən azı bir doza peyvənd olunub, əhalinin 68,74 faizi isə tam peyvənd sxemini keçib.
AZƏRTAC xəbər verir ki, uğurlu immunizasiya kampaniyası iqtisadi böhranın davam etməsi fonunda həyata keçirilib.
Soberana 01, Soberana Plus və Abdala - tətbiq edilən beş peyvənddən üçüdür.
Hələ də ÜST-nin təsdiqini gözləyən Kuba peyvəndləri praktikada və çoxsaylı tədqiqatlarda yüksək etibarlılıq və effektivlik nümayiş etdiriblər.
Gələn ilin ikinci yarısında tam başa çatdırılması planlaşdırılan Soberana Plus, kritik vəziyyətdə olan xəstələrdə 92 faiz effektivlik göstərib və artıq Soberana 01 və ya Abdala ilə peyvənd olunan şəxslərdə buster dozası kimi tətbiq olunur.
Kuba Vaksinlər İnstitutu və Kubanın Genetik Mühəndislik və Biotexnologiya Mərkəzi tərəfindən hazırlanmış Soberana Plus, Soberana 01 və Abdala vaksinləri artıq dünyanın müxtəlif bölgələrində tətbiq olunur.
Hazırda Kubada koronavirusdan ölüm halları 0,87 faiz, dünyada 2,02 faiz, Amerika regionunda isə 2,44 faiz təşkil edir.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
