Kuba lideri Avropa ölkələrinə səfər edəcək
Bakı, 19 iyun, AZƏRTAC
Kuba Prezidenti Migel Dias-Kanel iyunun 20-24-də Avropa ölkələrinə səfər edəcək.
AZƏRTAC xəbər verir ki, Kuba Xarici İşlər Nazirliyinin məlumatına görə, Prezident Migel Dias-Kanel “Dünyanın yeni maliyyə paktı” barədə Parisdə keçiriləcək “77-lər qrupu üstəgəl Çin” sammitinə sədr qismində qatılacaq. Kuba lideri, həmçinin İtaliyada, Vatikanda və Serbiyada səfərdə olacaq. Kubanın nümayəndə heyətinin tərkibinə xarici işlər naziri Bruno Rodriges də daxildir.
“77-lər qrupu üstəgəl Çin” sammitinə ilk dəfə olaraq Kuba sədrlik edəcək. Təşkilatın yaradılması barədə qərar 1964-cü ildə Asiya, Afrika və Latın Amerikasının inkişaf etməkdə olan ölkələrinin nazirlər səviyyəsində iclasında qəbul edilib. Əvvəlcə struktura 77 ölkə daxil idi. İndi isə BMT çərçivəsində fəaliyyət göstərən və ən iri dövlətlərarası qurumlardan birinə çevrilən təşkilatda üzvlərin sayı ümumilikdə 6 milyard nəfərin yaşadığı 134 ölkəyə çatıb.
Bölmənin digər xəbərləri
