KÜRDƏMİR RAYON AĞSAQQALI VAQİF HACIYEVİN ÇIXIŞI
Biz, ümummilli liderimiz Heydər Əliyevin ideyalarına daim sadiqlik nümayiş etdirən kürdəmirlilər Sizin rayonumuza səfərinizi çoxdan, intizarla gözləyirdik. Eyni zamanda, biz bu əlamətdar görüşə böyük məsuliyyət hissi ilə hazırlaşırdıq. Sizi, Azərbaycan təhsilinə və mədəniyyətinə böyük xidmətlər göstərən Heydər Əliyev Fondunun prezidenti, YUNESKO-nun xoşməramlı səfiri hörmətli Mehriban xanım Əliyevanı rayonumuzun rəhbərliyi, ağsaqqalları, ziyalıları, gəncləri, bütövlükdə bütün qədirbilən Kürdəmir camaatı adından salamlayır və Sizə “Xoş gəlmisiniz!” deyirik.
Əziz Prezidentimiz, əmin ola bilərsiniz ki, müstəqil dövlətimizin qurucusu və memarı olan Heydər Əliyevin ölməz ideyaları daim bizimlədir. Ümummilli liderimiz daim Azərbaycan xalqının mənafeyini düşünən bir öndər olmuş, bu istiqamətdə apardığı məqsədyönlü siyasət onun bütün fəaliyyətinin əsasını təşkil etmişdir. Heydər Əliyev bütün ömrü boyu Azərbaycanı yüksəltmək, onu inkişaf etdirmək naminə əlindən gələni əsirgəməmişdir. Bu gün biz qürur hissi keçiririk ki, ümummilli liderimizin ölməz ideyalarını onun siyasi varisi, Heydər Əliyev siyasi xəttinin ən layiqli davamçısı, müstəqil Azərbaycan Respublikasının Prezidenti cənab İlham Əliyev uğurla həyata keçirir.
Əziz Prezidentimiz, mən Sizə rayonumuzda olan dəyişikliklər, görülmüş işlər haqqında qısa şəkildə məlumat vermək istəyirəm. Bildirirəm ki, ümummilli liderimiz Heydər Əliyevin gərgin əməyi, apardığı məqsədyönlü daxili və xarici siyasət nəticəsində bərqərar olmuş ictimai-siyasi sabitlik respublikamızın hər yerində olduğu kimi, Kürdəmirdə də hökm sürür. Rayonumuzda vəziyyət sabitdir və gözəl ab-hava vardır. Elə bunun nəticəsidir ki, quruculuq, tikinti, abadlıq işləri geniş vüsət almışdır. Rayonumuzun siması gözlərimiz önündə günü-gündən müsbət mənada dəyişir.
Möhtərəm Prezidentimiz, Sizin təsdiq etdiyiniz regionların sosial-iqtisadi inkişafı Dövlət proqramının yerinə yetirilməsi çərçivəsində son iki ilə yaxın bir müddət ərzində rayonumuzda çox önəmli işlər görülmüşdür. Küçələrimiz abadlaşır, yeni parklar, xiyabanlar salınır. Xeyli məktəb binası inşa edilmişdir. Ehtiyac duyulan məktəblərdə əsaslı və cari təmir işləri görülmüş, əlavə sinif otaqları tikilmişdir. Təkcə bu il “Yeniləşən Azərbaycana yeni məktəb” Proqramı çərçivəsində Heydər Əliyev Fondunun vəsaiti hesabına rayonun Karrar, Bəyi və Sovla məktəblərində müasir tipli məktəb binalarının inşasına başlanmışdır. İndi onlarda son tamamlama işləri gedir.
Rayonun Karrar ərazisində məskunlaşmış Laçın və Şuşa rayonlarından olan məcburi köçkün övladlarının təhsil alması üçün müasir tipli məktəb inşa edilmiş, yeni dərs ili ümummilli liderimiz Heydər Əliyevin təşəbbüsü ilə təsis edilmiş “Bilik günü” münasibətilə istifadəyə verilmişdir.
Rayonumuzda Heydər Əliyev parkı, Qələbə, 20 Yanvar parkları salınmış, 3 kilometr uzunluğunda olan Heydər Əliyev prospektində yenidənqurma işləri aparılmışdır. Ən müqəddəs and yerimiz olan Şəhidlər xiyabanında əsaslı yenidənqurma işləri aparılmışdır.
Möhtərəm cənab Prezident, son bir ildə, şəhər əhalisinin, demək olar ki, tam əksəriyyəti mavi yanacaqla təmin edilmişdir. Sirr deyil ki, bu gün bizim rayon əhalisinin içməli suya böyük tələbatı vardır. Camaatımız üçün həyati əhəmiyyətli bu məsələ də öz həllini tapmaqdadır. Bu məqsədlə 34 kilometr məsafədən 2-ci Külüllü-Kürdəmir su xətti çəkilməkdədir.
Elektrik enerjisi ilə təminatı yaxşılaşdırmaq üçün təkcə bu il rayonumuza iki ədəd yeni transformator gətirilib quraşdırılmışdır və bu sahədə işlər davam etdirilməkdədir.
Möhtərəm cənab Prezident, Siz bir neçə dəfə rayonumuzda olmusunuz. Ulu öndərimiz Heydər Əliyevlə birlikdə də gəlmisiniz. Onda da çıxış etmək mənə nəsib olmuşdu. Bir daha Sizə bəyan edirəm ki, rayonumuzda sağlam ab-hava vardır. Mən son illər görülmüş bütün işlər haqqında qısa vaxt çərçivəsində Sizə ətraflı məlumat verə bilmirəm. Hesab edirəm ki, Siz özünüz bu işlərin şahidi olacaqsınız, rayonumuzda sağlam ab-havanın hökm sürdüyünü bir daha görəcəksiniz.
Bu gün Sizin xeyir-duanızla bizim gənclərimizin, idmançılarımızın çoxdan böyük səbirsizliklə gözlədikləri bir hadisə baş verəcək – Olimpiya İdman Kompleksinin özülü qoyulacaqdır. Qədirbilən kürdəmirlilər bütün bu işləri ölkə rəhbəri kimi, Sizin rayonumuza göstərdiyiniz mütəmadi diqqət və qayğının təzahürü kimi çox yüksək qiymətləndirirlər.
Bir daha bəyan edirəm ki, kürdəmirlilərin yolu Heydər Əliyev yoludur, Heydər Əliyev siyasi xəttidir. Çünki Heydər Əliyev siyasi xətti bu günümüzün, sabahımızın və gələcəyimizin, inkişafımızın, tərəqqimizin etibarlı təminatıdır. Ümummilli liderimiz, əbədiyaşar Heydər Əliyevin ideyaları bizim dövlətçilik ruhumuzdur. Nə qədər ki, Azərbaycan bu yolla gedəcək, tarix, zaman xalqımızın xeyrinə işləyəcəkdir. Bir daha vaxt tapıb rayonumuza görüşə gəldiyinizə görə Sizə rayon rəhbərliyi, rayon ictimaiyyəti adından bir daha dərin təşəkkürümüzü bildirirəm. Sizə uzun ömür, möhkəm cansağlığı, Azərbaycanın xoşbəxt gələcəyi naminə apardığınız məqsədyönlü fəaliyyətinizdə böyük uğurlar arzulayıram.
X X X
Prezident İlham Əliyev görüşdə nitq söylədi.
X X X
Sonra Prezident İlham Əliyev sakinlərlə səmimi görüşdü, onların qayğıları və problemləri ilə maraqlandı. Sakinlər heç bir problemin olmadığını söyləyərək, Prezidentə cansağlığı arzuladılar və ümummilli lider Heydər Əliyevin müdrik siyasətini uğurla davam etdirdiyinə görə təşəkkürlərini bildirdilər və dövlətimizin başçısının daxili və xarici siyasətini dəstəklədiklərini vurğuladılar.
Bölmənin digər xəbərləri
