Küveytdə Xocalı soyqırımının 22-ci ildönümü ilə əlaqədar silsilə tədbirlər keçirilir
Bakı, 24 fevral (AZƏRTAC). Xocalı soyqırımının 22-ci ildönümü ilə əlaqədar Azərbaycanın Küveytdəki səfirliyi tərəfindən silsilə tədbirlər keçirilir.
Belə tədbirlərdən biri Küveytdə yaşayan, işləyən, təhsil alan həmvətənlərimizin, ölkə ictimaiyyətinin nümayəndələrinin iştirakı ilə səfirlikdə keçirilmişdir.
Əvvəlcə Xocalı faciəsi qurbanlarının xatirəsi bir dəqiqəlik sükutla yad edilmişdir.
Səfir Tural Rzayev və səfirliyin müşaviri T.Xəlilov tədbirdə çıxış edərək 1992-ci il fevralın 25-dən 25-na keçən gecə Xocalıda ermənilərin sovet ordusunun 366-cı motoatıcı alayının köməyi ilə törətdikləri ağlasığmaz qəddarlıqdan söhbət açmışdır. Həmçinin ölkəmizin taleyüklü problemi olan Dağlıq Qarabağ münaqişəsi, Azərbaycan ərazilərinin erməni vandalları tərəfindən işğalı zamanı törədilmiş vəhşiliklər tədbir iştirakçılarının diqqətinə çatdırılmışdır.
Daha sonra iştirakçılar “Xocalı” sənədli filminə baxmış, səfirlikdə təşkil olunmuş fotostendlə tanış olmuşlar.
Azərbaycanın və Türkiyənin Küveytdəki səfirliklərinin təşkilatçılığı ilə bu ölkədə fəaliyyət göstərən türk orta təhsil məktəbində “Xocalı uşaqların gözü ilə” adlı sərgi açılmışdır.
Sərginin açılışında çıxış edən Türkiyənin Küveytdəki səfiri Murat Taner, məktəbin direktoru Müzəffər Çeven çıxış edərək Azərbaycan xalqının kədərinə şərik olduqlarını söyləmişlər.
Səfir Tural Rzayev çıxış edərək Xocalıda törədilmiş vəhşiliklər barədə ətraflı məlumat vermişdir.
Sərgi martın 2-dək davam edəcəkdir.
Bundan başqa, Küveytdə geniş oxucu kütləsinə malik “Əl-Ray” qəzetində səfir Tural Rzayevin “Xocalı soyqırımı” adlı məqaləsi dərc edilmişdir.
Məqalədə qeyd edilir ki, Xocalı hadisələri zamanı 613 nəfər dinc sakin, o cümlədən 83 uşaq, 106 qadın, 70 qoca xüsusi amansızlıqla öldürülmüş, 1275 nəfər əsir götürülmüş, 150 insan itkin düşmüşdür. Bildirilir ki, Xocalı qətliamı təkcə Azərbaycan xalqına qarşı deyil, bəşəriyyətə qarşı törədilmiş cinayətdir.
Diqqətə çatdırılır ki, artıq 22 ildir Azərbaycan dövləti tərəfindən Xocalı həqiqətlərinin dünyaya çatdırılması istiqamətində mühüm işlər görülür. Artıq dünya dövlətləri Xocalı soyqırımını tanımağa başlamışlar. Bu işdə Heydər Əliyev Fondunun vitse-prezidenti, Dialoq və Əməkdaşlıq uğrunda İslam Konfransı Gənclər Forumunun Mədəniyyətlərarası Dialoq üzrə baş əlaqələndiricisi Leyla Əliyevanın təşəbbüsçüsü olduğu “Xocalıya ədalət” beynəlxalq təbliğat və məlumatlandırma kampaniyasının böyük rolu vardır. Kampaniyanın məqsədi Xocalı faciəsi haqqında tarixi həqiqətlərin beynəlxalq ictimaiyyətə çatdırılmasıdır.
Bildirilir ki, ermənilərin Azərbaycan xalqına qarşı həyata keçirdiyi təcavüzkar əməllər dünya birliyi tərəfindən pislənilir. İslam Əməkdaşlıq Təşkilatı tərəfindən bir sıra qərar və qətnamələr qəbul edilmişdir ki, bu sənədlərdə Ermənistan silahlı qüvvələrinin işğal olunmuş Azərbaycan ərazilərindən qeyd-şərtsiz çıxmaları tələb edilir.
Qeyd edək ki, Azərbaycanın insan hüquqları üzrə müvəkkilinin Xocalı soyqırımının 22-ci ildönümü ilə əlaqədar bəyanatının mətni Küveytin parlamentinə, Xarici İşlər Nazirliyinə, ölkədə akkreditə olunmuş səfirliklərə və beynəlxalq təşkilatlara göndərilmişdir. Həmçinin Qafqaz Müsəlmanları İdarəsinin sədri Allahşükür Paşazadənin soyqırımının 22-ci ildönümü ilə bağlı dünya dini liderlərinə, parlamentlərə, beynəlxalq təşkilatlara və İnsan Hüquqları üzrə Avropa Məhkəməsinə ünvanladığı müraciətin mətni ərəb dilinə tərcümə olunaraq Küveyt dövlətinin Vəqflər və İslam Məsələləri Nazirliyinə və dini xeyriyyə qurumlarına göndərilmişdir.
Faciənin ildönümü ərəfəsində Küveytin məscidlərində cümə namazı xütbələrində Xocalı soyqırımının qurbanlarının xatirəsinə dualar oxunmuşdur.
Bölmənin digər xəbərləri
