Bakı, 25 aprel, AZƏRTAC

Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulması tarixi zərurətdən irəli gəlib. Çünki, uzun müddətdir ermənilər Qarabağ iqtisadi zonasında terror fəaliyyəti həyata keçirirdi. Nəzarətsiz yoldan avtomobillərdə minalar daşıyaraq yerləşdirirdi. Aprelin 22-də isə üç hərbi qulluqçumuz minaya düşərək xəsarət aldı. Bütün bu hadisələr fonunda Azərbaycana keçid olan ərazidə postun yaradılması böyük tarixi reallıqdır. Bu qırx dörd günlük Vətən müharibəsindən sonra Sarıbaba, Fərrux yüksəkliyi uğrunda aparılan uğurlu əməliyyatların davamıdır. Prezident İlham Əliyev dəfələrlə qeyd etmişdi ki, ermənilər terrordan əl çəkmir, sülhdən yayınır və sülhün yaradılması üçün yeganə şərt Qarabağ iqtisadi zonasında silahlanmanın dayandırılmasıdır. Bu silahlanma da gizli şəkildə cığırlarla, dərələrlə gedən yollarla aparılırdı. Gorus istiqamətində kiçik cığırlarla erməni silahlıları terror hadisələrini törədirdilər. Buraxılış məntəqəsinin yaradılması ilə bunun qarşısı alındı. Dövlətimizin başçısı hər dəfə mətbuat vasitəsilə müraciətlərində Azərbaycan üçün sülh müqaviləsinin imzalanmısının əsas prioritet olduğunu bildirir.

Bu fikirləri AZƏRTAC-a müsahibəsində Həmvətənlərə Dəstək İctimai Birliyinin təsisçisi, Qarabağ müharibəsi veteranı, ehtiyatda olan polkovnik-leytenant, hərbi-siyasi ekspert Elmar Hüseyn deyib.

O xatırladıb ki, dekabrın 12-dən ekoaktivistlərimiz Laçın-Xankəndi yolunda sərvətlərimiz daşınması ilə bağlı aksiya keçirirlər. Ekofəallar Azərbaycanın təbii sərvətlərinin daşınması ilə bağlı keçirdikləri aksiyalar, eyni zamanda, ermənilərin silahlanmasının və mina terrorunun baş verməsinin qarşısını aldı. Belə ki, Ermənistan tərəfindən aprelin 22-də saat 17:00 radələrində Rusiya Federasiyası sülhməramlı kontingentinin müvəqqəti yerləşdirildiyi Azərbaycan ərazisində vəziyyətin gərginləşdirilməsi məqsədilə Şuşa rayonunun Allahqulular kəndi istiqamətindəki torpaq yolda növbəti təxribat törədildi. Həmin kəndin ətrafındakı yüksəkliklərdəki mövqelərimizə təminat vasitələrini daşıyan Azərbaycan Ordusunun hərbi yük maşını ermənilər tərəfindən qəsdən yolun hərəkət istiqamətində basdırılmış minaya düşərək partladıldı. Bu onu göstərir ki, həmin ərazidə tank əleyhinə minalardan və sürpriz minalardan istifadə olunub. Çünki tank əleyhinə minaların ağır texnikanın çəkisinə görə partlaması planlaşdırılıb. Ancaq onu piyada əleyhinə mina ilə birlikdə basdırarkən partlayış nəticəsində avtomobil və digər yüngül texnikaların da minaya düşmə ehtimalı olur. Minalanma işləri aparılması nəticəsində üç hərbi qulluqçumuz partlayış nəticəsində yaralandı.

Düşmən ölkənin indi də hərbiçilərimizin istifadə etdiyi əsasən təminat yollarında mina basdırmalarına toxunan Qarabağ müharibəsi veteranı xatırladıb ki, Şuşanın ətraf ərazilərində otuz il ərzində heç bir mina olmayıb. Əgər mina olsaydı erməni silahlıları da bu yollardan istifadə edərkən minaya düşərdi. Məhz 2020-ci il Vətən müharibəsindən sonra bu minalar qoyulub və onlar 2021-ci ildə Ermənistanda istehsal olunan yeni hərbi sursatlardır. Erməni silahlıları tərəfindən Şuşa rayonu istiqamətində yerləşdirilən minalar İkinci Qarabağ müharibəsinədək döşənməyib. Çünki bu dövrdə həmin ərazilərdə döyüş əməliyyatı aparılmayıb. Bu minalar yeni quraşdırılıb. Həmin dövrdə ərazinin minalanması keçmiş təmas xəttində həyata keçirilib.

Dəfələrlə Rusiya sülhməramlı kontingentinin müşayiəti altında hərbi maşınlarda Azərbaycan ərazisindəki qeyri-qanuni erməni silahlı dəstələri üçün Qarabağa canlı qüvvə, silah-sursat, mina, eləcə də digər hərbi təyinatlı vasitələrin daşınmasının həyata keçirilməsi aşkarlanıb. Belə ki, aprelin 22-si axşam saat 20:00-da ordumuzun müşahidə kameraları Ermənistana məxsus üzərilərində yaşayış konteynerləri olmaqla, beş hərbi nəqliyyat texnikasının Laçın rayonunda hərəkətini qeydə alıblar. Bu Azərbaycanın ərazisində yeni postların yaradılması məqsədi daşıyıb. Hərbi təyinatlı yüklərin Ermənistandan Azərbaycana daxil olması Rusiya sülhməramlılarının buna şərait yaratması ilə həyata keçirilib. Bu işlər Ermənistan tərəfindən 2020-ci il 10 noyabr tarixli üçtərəfli Bəyanatın birtərəfli qaydada pozularaq Azərbaycan tərəfli ilə əvvəlcədən razılaşdırılmadan aparılıb. Rusiya sülhməramlı qüvvələrinin də fəaliyyətsizliyi nəticəsində erməni separatçıları ərazilərimizdə post qoyublar.

Hərbi-siyasi ekspertin sözlərinə görə, daha əvvəl Azərbaycan Ordusu tərəfindən Xəlfəli istiqamətində hakim yüksəkliklər nəzarətə götürülüb, iki kəndimiz düşmən nəzarətindən geri qaytarılıb. Öz məkrli siyasətini davam etdirən ermənilər dövlət sərhədimizə və Azərbaycan ərazi bütövlüyünə qəsd kimi mina müdafiə istehkamları qurublar. Belə ki, istər humanitar yol, istərsə də digər yollarda postlardan keçən avtomobillərin yoxlanılması artıq zərurətə çevrilmişdi. Şəxsi heyətimizin yeni itkilərinin verilməsinin qarşısını almaq, ümumiyyətlə Qarabağ iqtisadi zonasının təhlükəsizliyini təmin etmək məqsədilə Laçın yolunda Dövlət Sərhəd Xidmətinin nəzarət-buraxılış məntəqəsi quruldu. Beləliklə, Rusiya sülhməramlı qüvvələrinin fəaliyyət göstərdiyi ərazilərdə hərbi sursatların daşınmasının qarşısı ciddi şəkildə alındı.

Ehtiyatda olan polkovnik-leytenant deyib ki, digər əsas məqam ərazilərdə minaların olması insanların tarixi ata-baba yurdlarına qayıdışına mane olur. Bizim bir milyon keçmiş məcburi köçkünümüz mövcuddur. Bu gün Avropa İttifaqının missiyası Xankəndində yaşayan ermənilərin taleyindən danışır. Azərbaycanın bir milyon vətəndaşımızın əraziyə qayıtmaları üçün şərait yaradılmalıdır. Həmçinin bu gərgin vəziyyət infrastrukturun bərpasını ləngidir, eyni zamanda, insanlara təsir edir. 2020-ci ildən indiyədək artıq 200-dən çox mülki vətəndaşımız, o cümlədən hərbi qulluqçumuz mina terrorunda həyatını itirib. Azərbaycan-Ermənistan dövlət sərhədində, hətta Avropa İttifaqının sülhməramlı missiyasının müşahidə etdiyi ərazilərdə ermənilərin dəfələrlə törətdiyi təxribatların qarşısının ordumuz tərəfindən alınmasının şahidi olmuşuq. Odur ki, biz mütləq şəkildə öz dövlət sərhədimizi bərpa etməliydik.

“Ermənistanda mayın ilkin həftələrində səfərbərlik elan olunmuşdu. Həmin bu səfərbərlikdən toplanan gənclər, hərbiçilər bu yollarla avtomobillərdə Qarabağa aparılacaqdı. Yoldan sui-istifadənin nəticəsidir ki, indi Rusiya sülhməramlı kontingentinin yerləşdiyi Azərbaycan ərazilərində 10 min nəfərdən artıq şəxsi heyət toplanıb. Vəziyyətin bu formada davam etməsi Azərbaycan xalqı və dövləti üçün qəbul edilməz idi. Azərbaycan DSX-nın hazırda yaratdığı postlar isə bunun qarşısını alacaq”, - deyə Elmar Hüseyn vurğulayıb.