Latın Amerikası Xəbər Agentlikləri Birliyinin saytında “Xocalı - bəşəriyyətə qarşı cinayət” sərlövhəli məqalə yerləşdirilmişdir
Bakı, 27 fevral (AZƏRTAC). Latın Amerikası Xəbər Agentlikləri Birliyinin (ULAN) saytında Azərbaycanın Argentinadakı səfiri Məmməd Əhmədzadənin “Xocalı - bəşəriyyətə qarşı cinayət” sərlövhəli məqaləsi yerləşdirilmişdir. Bu barədə AZƏRTAC-a səfirlikdən məlumat verilmişdir.
Səfir məqalədə Xocalı soyqırımı və onun acı nəticələri, Ermənistanın Azərbaycana qarşı təcavüzü, Xocalı həqiqətlərinin dünya ictimaiyyətinə çatdırılması istiqamətində həyata keçirilən “Xocalıya ədalət!” kampaniyası, beynəlxalq təşkilatların Dağlıq Qarabağ münaqişəsi ilə bağlı qəbul etdiyi sənədlər, habelə problemin həllinə dair danışıqların hazırkı vəziyyəti haqqında məlumat verir.
Müəllif yazır ki, bəşəriyyət tarixində baş vermiş ən qəddar qətliamlardan biri olan və Xocalı soyqırımı adı ilə tanınan faciə 22 il əvvəl Azərbaycan Respublikasının Dağlıq Qarabağ bölgəsində yerləşən Xocalı şəhərində dinc azərbaycanlı əhaliyə qarşı törədilmişdir.
1992-ci il fevralın 25-dən 26-na keçən gecə Ermənistan silahlı qüvvələri keçmiş SSRİ ordusunun 366-cı motoatıcı alayının köməyi ilə misli görünməmiş vəhşiliklər törədərək Xocalını işğal etmiş və yüzlərlə dinc azərbaycanlını məhv etmişlər. Bu faciə nəticəsində 103 qadın və 63 uşaq daxil olmaqla 613 günahsız və silahsız insan həlak olmuşdur. Onların arasında 56 nəfəri xüsusi amansızlıqla qətlə yetirilmiş, 8 ailə tamamilə məhv edilmiş, 25 uşaq hər iki valideynini, 130 uşaq isə valideynlərindən birini itirmiş, 1275 nəfər əsir götürülmüş, sonradan onların böyük əksəriyyətinin azad edilməsinə baxmayaraq, 150 insanın taleyi bu günədək naməlumdur.
Diqqətə çatdırılır ki, Xocalı soyqırımı Ermənistan tərəfindən Azərbaycan Respublikasının Dağlıq Qarabağ bölgəsinin ilhaqı məqsədilə başlanan münaqişə zəminində baş vermiş təsadüfi bir hadisə deyil, məqsədli şəkildə törədilmiş kütləvi qətl hadisəsi idi. Xocalı Ermənistan hərbi təcavüzünün zirvə nöqtəsi idi. Bu təcavüz nəticəsində Dağlıq Qarabağ və ona bitişik 7 rayon daxil olmaqla, ümumilikdə Azərbaycanın beynəlxalq səviyyədə tanınmış ərazilərinin 20 faizi işğal edilmişdir və etnik təmizləmə nəticəsində 1 milyondan artıq azərbaycanlı qaçqın və məcburi köçkünə çevrilmişdir.
Qeyd edilir ki, Ermənistan rəhbərliyinin Xocalıda baş vermiş və münaqişə dövründə həyata keçirilmiş digər cinayətlərə görə cavabdehlikdən imtina etməsinə baxmayaraq, qəddarlıqla həyata keçirilmiş bu hadisələr çoxsaylı müstəqil mənbələr və hadisə şahidləri tərəfindən sənədləşdirilmişdir. “Qara Bağ: Ermənistan və Azərbaycan sülh və savaş yollarında” kitabında Tomas de Vaal Xocalı qətliamının səbəblərini etiraf edən Ermənistan Respublikasının hazırkı prezidenti Serj Sarkisyandan sitat gətirir: “Xocalıdan öncə azərbaycanlılar düşünürdülər ki, ermənilər dinc əhaliyə əl qaldırmağa qadir olmayan insanlardır. Biz bu stereotipi dağıtmağa nail olduq. Bu da baş verdi”. Human Rigths Watch təşkilatı öz hesabatında Xocalı hadisələrini “Ermənistan-Azərbaycan münaqişəsi boyunca bu günədək baş vermiş ən böyük qətliam” kimi təsvir etmişdir.
Diqqətə çatdırılır ki, dünya birliyini bu faciə barədə məlumatlandırmaq məqsədilə 2008-ci ildən etibarən aparılan “Xocalıya ədalət!” beynəlxalq kampaniyası geniş əks-səda doğurmuşdur. Xocalı hadisələri də daxil olmaqla Ermənistan tərəfindən azərbaycanlı dinc əhaliyə qarşı törədilmiş digər cinayətlər beynəlxalq ictimaiyyət tərəfindən qınanılmalı və onlara lazımi siyasi-hüquqi qiymət verilməlidir. Çünki cəzasız qalan cinayətlər yeni cinayətlərə yol açır. Bu məqsədlə əvvəlcə Dağlıq Qarabağ münaqişəsi həll olunmalıdır. Ermənistanın təcavüzü 20 ildən artıq davam etdirməsinə və Azərbaycan ərazilərinin işğal altında olmasına baxmayaraq, rəsmi Bakı münaqişənin sülh yolu ilə həll olunması üçün cəhdlərini davam etdirir. Əfsuslar olsun ki, Ermənistanın məqsədi münaqişə ilə bağlı hazırkı status-kvonu saxlamaqdır və bu ölkənin bu cür destruktiv mövqeyinin nəticəsidir ki, münaqişə hələ də öz həllini tapmamışdır. Erməni hərbi qüvvələrinin Azərbaycanın işğal edilmiş ərazilərindən dərhal və qeyd-şərtsiz çıxarılmasını və azərbaycanlı qaçqın və məcburi köçkünlərin öz yurdlarına qayıtmalarının təmin olunmasını tələb edən BMT Təhlükəsizlik Şurasının 822, 853, 874 və 884 saylı qətnamələri, BMT Baş Məclisinin 2008-ci il 62/243 saylı qətnaməsi, ATƏT, Avropa Şurasının Parlament Asambleyası, Avropa Parlamenti və digər beynəlxalq təşkilatların sənədləri Ermənistan tərəfindən icra edilmir.
Bildirilir ki, münaqişə ilə bağlı hazırkı status-kvo nəinki yalnız regionda sülh və təhlükəsizliyə təhdid yaradır, həmçinin Ermənistandakı ağır sosial-iqtisadi vəziyyəti daha da çətinləşdirir. Azərbaycan güclü iqtisadiyyata malik olmaqla regional inteqrasiya və əməkdaşlığın əsas iştirakçısı, Avropa ilə Xəzər hövzəsini birləşdirən beynəlxalq əhəmiyyətli enerji və infrastruktur layihələrinin müəllifidir. Münaqişənin həlli nəinki regiona sülh gətirəcək, həmçinin Ermənistanı da regional əməkdaşlığa cəlb edəcək və bu ölkənin çətin sosial-iqtisadi problemlərinin həllinə yardım edəcəkdir. Əgər Ermənistan rəhbərliyi həqiqətən də münaqişənin həllində, regionda sülhün bərqərar olmasında və əhalisinin firavan gələcəyinin təmin edilməsində maraqlıdırsa, bunun üçün konstruktivlik nümayiş etdirməli, beynəlxalq hüquqa hörmət etməli və yuxarıda sadalanan beynəlxalq təşkilatların tələblərini yerinə yetirməlidir.
Qeyd edək ki, ULAN dünyanın aparıcı regional xəbər agentlikləri birliklərindən biridir və bu qurumun tərkibinə Argentinanın “TELAM”, Boliviyanın “ABI”, Braziliyanın “AGENCIA BRASIL”, Kubanın “PRENSA LATINA”, Ekvadorun “ANDES”, Quatemalanın “AGN”, Meksikanın “NOTIMEX”, Paraqvayın “IP” və Venesuelanın “AVN” milli xəbər agentlikləri daxildir.
Bölmənin digər xəbərləri
