LEVON TER-PETROSYAN: ERMƏNİSTANIN XARİCİ SİYASƏTİ BOŞ VƏ MƏNASIZ BƏYANATLAR TOPLUSUDUR
AZƏRTAC-ın REGNUM agentliyindən aldığı xəbərdə deyilir ki, son 10 ildə Ermənistanın xarici siyasəti konkret addımlarla təsdiqlənməyən boş və mənasız bəyanatlar toplusundan başqa bir şey deyildir.
Bunu Ermənistanın birinci prezidenti Levon Ter-Petrosyan dekabrın 8-də Yerevanda keçirilmiş növbəti mitinqdə bəyan etmişdir.
Ter-Petrosyan demişdir ki, Ermənistan iqtidarı siyasətin konkret əməllərdən ibarət olduğunu başa düşmədiyindən, təkcə özünü deyil, bütövlükdə ölkəni pis vəziyyətdə qoyur, çox vaxt öz bəyanatlarının əsiri olur.
Ermənistanın birinci prezidenti bacarıqsız siyasətçilərin təqsiri üzündən Ermənistanın xarici siyasətində uğursuzluqlara dəlalət edən 10 nümunə göstərmişdir. O demişdir: “Ermənistanın hakimiyyət orqanları ABŞ Konqresindən Azərbaycana qarşı sanksiyalar tətbiq edən Azadlıq Aktına 907-ci düzəlişin qüvvədə saxlanmasını tələb edirdilər. Lakin Konqres bu tələbə əməl etmədi. Elə həmin orqan erməni soyqırımını tanımağa çağırırdı, lakin bunun nə ilə başa çatdığını hamımız gördük. Onlar Türkiyəni bizimlə münasibətləri Qarabağ amili ilə şərtləndirməməyə çağırırdılar, lakin bundan da bir şey çıxmadı. Onlar Türkiyənin qarşısında lap əvvəldən soyqırımını tanımaq şərtini qoymuşdular, lakin sonra özləri bundan imtina etdilər və ilkin şərt qoyulmadan münasibətlər yaradılmasına razılaşdılar. Onlar Qars-Axalkalaki-Bakı dəmir yolunun tikintisinə yol verilməməsini beynəlxalq birliyə diktə etmək istəyirdilər, lakin bu layihə artıq gerçəkləşməkdədir. Onlar Axalkalakidəki Rusiya hərbi bazasının oradan çıxarılmasının əleyhinə idilər, lakin bu baza artıq orada yoxdur. Onlar bəyan edirlər ki, Ermənistan blokada vəziyyətində inkişafı davam etdirə bilər, lakin daim blokadadan şikayətlənirlər. Onlar deyirlər ki, ermənilərin və azərbaycanlıların dinc yanaşı yaşaması mümkün deyil, lakin daim barışıq haqqında danışırlar. Onlar deyirdilər ki, Qarabağ məsələsi bizim üçün artıq həll edilmişdir, lakin nədənsə danışıqlardan imtina etmirlər. Onlar ATƏT-in zirvə toplantısının İstanbulda keçirilməsinə imkan vermək istəmirdilər, amma özləri həmin tədbirdə sakitcə iştirak etdilər və üstəlik, məşhur Xartiyanı imzalamaqla, Azərbaycanın ərazi bütövlüyünü dövlət səviyyəsində qəbul etdilər”.
Levon Ter-Petrosyan demişdir ki, bütün bunlar Ermənistanın xarici siyasətində biabırçı məğlubiyyətlər silsiləsidir və Prezident Robert Koçaryan, eləcə də xarici işlər naziri Vardan Oskanyan bu məğlubiyyətləri etiraf etmək iqtidarında deyillər. Bunula bərabər, Ter-Petrosyan Ermənistanın öz iradəsindən asılı olmayan proseslərdə iştirakının məqsədəuyğun olmasına şübhə etdiyini bildirmişdir. O, nümunə kimi Ermənistanın Türkiyə ilə Avropa İttifaqı arasında münasibətlərə müdaxiləsini misal göstərmişdir. “Məgər aydın deyildirmi ki, Ermənistan Türkiyənin Aİ-yə daxil olmasına nə kömək edə, nə də əngəl törədə bilər. Türkiyənin Aİ üzvlüyünə dair danışıqlara başlamamaq tələbi ilə Brüsselə məktublar göndərmək və ya Aİ qarşısında erməni soyqırımının tanınmasını şərt qoymaq bizim nəyimizə gərəkdir?! Əgər Avropa bunu istəsəydi, bizim xahişimiz olmadan da bu şərti irəli sürə bilərdi”, - deyən Ter-Petrosyan daha sonra vurğulamışdır ki, Türkiyənin Aİ-yə üzv olması Ermənistana həm iqtisadi, həm də siyasi parametrlərə görə sərfəlidir. O demişdir: “Ermənistan üçün hansı Türkiyə daha çox qorxuludur - Aİ üzvü olan Türkiyə, yoxsa Qərb tərəfindən rədd edilmiş və Şərqə üz tutan Türkiyə?”.
Onun dediyinə görə, Ermənistan iqtidarı bu on ildə gördüyü mənasız işlər əvəzinə, bu prosesə nəinki mane olmamalı, hətta əksinə, Brüsseldən tələb etməli idi ki, soyqırımı məsələsi ilə möhtəkirlik edilməsin və bu problemin həlli tərəflərin öhdəsinə buraxılsın. “Heç kəs Türkiyəni soyqırımı faktını tanımağa məcbur edə bilməz. Lakin bu, iki ölkə arasında dostluq münasibətləri yaradılandan və qarşılıqlı etimad ab-havası formalaşandan sonra mümkündür”. Ermənistanın birinci prezidenti ölkə rəhbərliyinə məzlumluq psixologiyasından imtina etməyi və səni incidəni başqasının incitməsindən ruhlanmamağı tövsiyə etmişdir.
Bölmənin digər xəbərləri
