Azərbaycan səhiyyəsi sosial dövlət siyasətinin əsas istiqamətlərindən biri kimi inkişaf edir – RƏY
Bakı, 17 iyun, AZƏRTAC
Səhiyyə sistemi hər bir dövlətin sosial siyasətinin əsas istiqamətlərindən biri olmaqla yanaşı, cəmiyyətin rifahını, insan kapitalının inkişafını və ölkənin davamlı tərəqqisini müəyyən edən mühüm amildir. Azərbaycanda səhiyyə sahəsində əldə olunan nailiyyətlər insan sağlamlığının dövlət siyasətində prioritet istiqamət kimi müəyyənləşdirilməsi ilə bağlıdır. Bu nəticələr məqsədyönlü islahatların həyata keçirilməsi və müasir idarəetmə prinsiplərinin tətbiqi ilə şərtlənir. Bu inkişaf yolunun təməlində Ümummilli Lider Heydər Əliyevin müəyyən etdiyi dövlətçilik strategiyası, akademik Zərifə Əliyevanın Azərbaycan tibb elminə verdiyi töhfələr və Prezident İlham Əliyevin rəhbərliyi ilə həyata keçirilən genişmiqyaslı islahatlar dayanır.
Bu fikirləri AZƏRTAC-a açıqlamasında Azərbaycan Tibb Universitetinin Tədris-Terapevtik Klinikasının Hepatologiya şöbəsinin rəhbəri, III Daxili Xəstəliklər kafedrasının tədris hissə müdiri, tibb üzrə fəlsəfə doktoru Hicran Xıdırova səsləndirib.
“Azərbaycanın müasir inkişaf modelində insan amili əsas prioritetlərdən biri kimi çıxış edir və bu yanaşma səhiyyə sahəsində həyata keçirilən siyasətdə də öz əksini tapır. Ümummilli Lider Heydər Əliyevin rəhbərliyi dövründə səhiyyə infrastrukturunun gücləndirilməsi, tibbi xidmətlərin genişləndirilməsi, yüksəkixtisaslı kadr hazırlığının təşviqi və əhalinin sağlamlığının qorunması istiqamətində mühüm addımlar atılaraq milli səhiyyə sisteminin inkişafı üçün möhkəm zəmin yaradılıb. Sonrakı dövrdə bu siyasət ardıcıl şəkildə davam etdirilərək səhiyyə müəssisələrinin yenilənməsi, müasir tibbi texnologiyaların tətbiqi və qabaqcıl beynəlxalq təcrübənin öyrənilməsi ilə daha da zənginləşdirilib. Azərbaycan tibb elminin inkişafında akademik Zərifə Əliyevanın xidmətləri xüsusi yer tutur. Görkəmli alim-oftalmoloqun oftalmologiya sahəsində apardığı tədqiqatlar, hazırladığı elmi əsərlər və yetişdirdiyi mütəxəssislər ölkənin tibb elminin inkişafına mühüm töhfələr verib, onun yüksək peşəkarlığı və humanizm prinsipləri Azərbaycan həkiminin nümunəsinə çevrilib. Müstəqillik dövründə isə Prezident İlham Əliyevin rəhbərliyi ilə Azərbaycan səhiyyəsi yeni inkişaf mərhələsinə qədəm qoyub. Son illərdə ölkənin bütün bölgələrində müasir xəstəxanalar, diaqnostika və müalicə mərkəzləri istifadəyə verilib, səhiyyə müəssisələrinin maddi-texniki bazası əhəmiyyətli dərəcədə gücləndirilib. Tibbi xidmətlərin keyfiyyətinin yüksəldilməsi, əhalinin səhiyyə xidmətlərinə çıxış imkanlarının genişləndirilməsi, müasir tibbi avadanlıqların tətbiqi və kadr potensialının inkişaf etdirilməsi ilə yanaşı, icbari tibbi sığorta sisteminin tətbiqi vətəndaşların tibbi xidmətlərdən daha geniş şəkildə faydalanmasına imkan yaradaraq səhiyyə sahəsində idarəetmənin səmərəliliyinin artırılmasına mühüm töhfə verib”, - deyə fəlsəfə doktoru diqqətə çatdırıb.
O qeyd edib ki, ölkənin səhiyyə sistemi ardıcıl və kompleks yanaşma əsasında inkişaf etdirilərək, sosial dövlət siyasətinin əsas istiqamətlərindən birinə çevrilib. Bu çərçivədə xüsusilə işğaldan azad olunmuş ərazilərdə həyata keçirilən genişmiqyaslı bərpa və quruculuq işləri səhiyyə infrastrukturunun formalaşdırılmasını da ön plana çıxarır. Qarabağ və Şərqi Zəngəzur iqtisadi rayonlarında müasir standartlara cavab verən xəstəxanalar, poliklinikalar, ailə sağlamlıq mərkəzləri və digər tibb müəssisələrinin yaradılması bölgələrin sosial-iqtisadi inkişaf konsepsiyasının mühüm tərkib hissəsini təşkil edir. Yeni yaşayış məntəqələrinin planlaşdırılması zamanı səhiyyə xidmətlərinə əlçatanlıq əsas prinsip kimi nəzərə alınır, müasir tibbi avadanlıqlarla təchiz edilən müəssisələr isə əhalinin keyfiyyətli tibbi xidmətlə təmin olunmasına xidmət edir. Eyni zamanda, rəqəmsal səhiyyə həllərinin tətbiqi və telemedisin imkanlarının genişləndirilməsi regionlarda yaşayan vətəndaşların ixtisaslaşmış tibbi xidmətlərə çıxışını daha da asanlaşdırır.
Hicran Xıdırova bildirib ki, Azərbaycanın səhiyyə sisteminin inkişafında Səhiyyə Nazirliyinin fəaliyyəti xüsusi rol oynayır. Nazirlik tərəfindən tibbi xidmətlərin keyfiyyətinin yüksəldilməsi, profilaktik tədbirlərin gücləndirilməsi, ictimai sağlamlığın qorunması və səhiyyə sisteminin müasir tələblərə uyğunlaşdırılması istiqamətində ardıcıl və məqsədyönlü tədbirlər həyata keçirilir. Müxtəlif dövlət proqramlarının icrası, vaksinasiya kampaniyalarının təşkili, yoluxucu və qeyri-yoluxucu xəstəliklərlə mübarizə sahəsində görülən işlər, eləcə də ana və uşaq sağlamlığının qorunması istiqamətində atılan addımlar bu siyasətin əsas prioritetlərini təşkil edir. Eyni zamanda, tibbi maarifləndirmənin genişləndirilməsi, vətəndaş müraciətlərinə operativ baxılması, elektron xidmətlərin tətbiqi və idarəetmədə şəffaflığın artırılması səhiyyə xidmətlərinin daha əlçatan və səmərəli olmasına şərait yaradır.
“İcbari tibbi sığorta modelinin tətbiqi mühüm mərhələ kimi çıxış edir. Bu mexanizm əhalinin tibbi xidmətlərdən daha geniş və bərabər şəkildə yararlanmasına imkan yaratmaqla yanaşı, səhiyyə xidmətlərinin keyfiyyətinin yüksəldilməsinə və idarəetmənin təkmilləşdirilməsinə töhfə verir. Eyni zamanda, rəqəmsal texnologiyaların tətbiqi — elektron resept, elektron xəstə kartları və onlayn qeydiyyat sistemləri səhiyyə xidmətlərinin daha operativ, şəffaf və səmərəli təşkilini təmin edir”, - deyə o əlavə edib.
Bölmənin digər xəbərləri
