Şahzadə Harri və Meqan Markl Böyük Britaniyaya səfər edəcəklər
London, 17 iyun, AZƏRTAC
Şahzadə Harri və Meqan Markl övladları ilə birlikdə gələn ay Böyük Britaniyaya səfər edəcəklər.
AZƏRTAC Britaniya mətbuatına istinadla xəbər verir ki, Sasseks hersoqu Şahzadə Harri və həyat yoldaşı Meqan Markl gələn ay övladları Arçi və Lilibetlə birlikdə Böyük Britaniyaya səfər etməyi planlaşdırırlar. Bildirilir ki, 7 yaşlı Arçi və 5 yaşlı Lilibet valideynlərini müşayiət edəcəklər. Səfər “Invictus Games” yarışlarının başlanmasının bir illiyi ərəfəsinə təsadüf edəcək.
Bu, Şahzadə Harrinin ailəsi ilə birlikdə son 4 ildə Böyük Britaniyaya ilk səfəri olacaq. Hazırda Kaliforniyada yaşayan Şahzadə daha əvvəl övladlarını doğulduğu ölkəyə gətirmək istədiyini dəfələrlə dilə gətirib. Kral III Çarlzın bu səfər zamanı nəvələri ilə görüşüb-görüşməyəcəyi hələ açıqlanmayıb. Kral III Çarlz indiyədək Arçi və Lilibetlə yalnız 1 dəfə görüşüb. O, nəvələrini sonuncu dəfə 2022-ci ildə mərhum Kraliça II Elizabetin yubileyi tədbirləri zamanı görüb.
Şahzadə Harri ötən il Britaniya kral ailəsi ilə münasibətlərin normallaşdırılmasını istədiyini bildirmişdi.
Bölmənin digər xəbərləri
