Beynəlxalq konfrans - “Azərbaycan Xalq Cümhuriyyəti və Alaş-Orda: dövlət quruculuğunun tarixi təcrübəsi”
Bakı, 18 iyun, AZƏRTAC
İyunun 17-də AMEA A.A.Bakıxanov adına Tarix və Etnologiya İnstitutunda “Azərbaycan Demokratik Respublikası və Alaş Orda: dövlət quruculuğunun tarixi təcrübəsi” adlı Beynəlxalq elmi konfrans keçirilib.
AZƏRTAC xəbər verir ki, konfransın açılışında Tarix və Etnologiya İnstitutunun elmi işlər üzrə direktor müavini, tarix elmləri doktoru, dosent İlqar Niftəliyev çıxış edərək Azərbaycan və Qazaxıstan arasında tarixi əlaqələrin, eləcə də milli dövlətçilik ənənələrinin araşdırılmasının əhəmiyyətindən danışıb. Digər çıxışlarda da beynəlxalq elmi konfransın Azərbaycan və Qazaxıstan arasında elmi-humanitar əməkdaşlığın daha da inkişafına xidmət edən mühüm platforma olduğu qeyd edilib.
Konfransda “Azərbaycan və Qazaxıstanda milli dövlətlərin yaranması: ortaq və fərqli xüsusiyyətlər”, “Qazaxıstan milli dövlətçiliyinin dirçəlişi: Alaş muxtariyyətinin və Alaş-Orda hökumətinin yaradılması”, “Azərbaycan Respublikasında parlamentarizmin yaranması (1918-1920)”, “Alaş Orda (Alaş Respublikası): Ulus Cuçi ərazisində unitar dünyəvi parlament respublikasının qurulması təcrübəsi”, “Azərbaycan Xalq Cümhuriyyəti və Alaş Ordada siyasi liderlik: müqayisəli təhlil”, “Alaş lideri Mustafa Şokayın Transxəzər Odisseyası: Bakıya səfər (fevral 1919) və Paris Sülh Konfransında türk xalqlarının inteqrasiyasının çətinlikləri”, “Alaş-Orda hökumətinin rus hərbi-siyasi qüvvələri ilə münasibətləri: tarixi təhlil”, “Alaş Orda və Azərbaycan Demokratik Respublikası liderlərinin azadlıq yolundakı birgə mübarizəsi (1917–1920 -ci illər)”, “Alaş Ordanın Qərb bölməsinin yaradılmasında A. Bükeyxanovun fəaliyyəti” və digər mövzularda çıxışlar dinlənilib. Dövrü xarakterizə edən maraqlı faktlar açıqlanıb, təhlillər aparılıb.
Məruzələrdə Azərbaycan Xalq Cümhuriyyəti və Alaş-Orda hökumətinin yaranması, parlamentarizmin təşəkkülü, siyasi liderlik, dövlətlərarası münasibətlər, Türküstan məsələsi və ortaq tarixi irs məsələləri geniş şəkildə müzakirə edilib. Qeyd olunub ki, Azərbaycan Xalq Cümhuriyyəti və Alaş-Orda XX əsrin əvvəllərində milli dirçəliş, demokratik inkişaf və dövlət müstəqilliyi ideyalarının təcəssümü kimi Azərbaycanın və Qazaxıstanın tarixində xüsusi yer tutur. Bu dövlət qurumlarının tarixi təcrübəsi, görkəmli siyasi xadimlərinin fəaliyyəti, parlament institutlarının formalaşması və modernləşmə istiqamətində atdıqları addımlar bu gün də elmi aktuallığını qoruyub saxlayır.
Konfrans çərçivəsində Azərbaycan və Qazaxıstanın tarixçiləri milli dövlət quruculuğu tarixi, siyasi liderlik, dövlətlərarası əlaqələr və intellektual elitaların qarşılıqlı münasibətləri ilə bağlı geniş məsələləri də müzakirə etmək imkanı əldə ediblər. Ortaq tarixi irsin öyrənilməsinin xalqlarımız arasında humanitar və elmi əlaqələrin daha da möhkəmlənməsinə xidmət etdiyi diqqətə çatdırılıb. Eyni zamanda, konfrans materiallarının çapının və əldə olunan nəticələrin tarix elminin inkişafına, beynəlxalq elmi əməkdaşlığın genişlənməsinə, eləcə də Azərbaycan Xalq Cümhuriyyəti və Alaş hərəkatının tarixinin daha dərindən araşdırılmasına mühüm töhfə verəcəyinə əminlik ifadə olunub.
Bölmənin digər xəbərləri
