Leysan xarakterli yağışlar nəticəsində əksər dağ çaylarında sululuq artmışdır
Bakı, 24 sentyabr (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti tərəfindən çaylarda suyun səviyyəsi ilə bağlı araşdırma aparılmışdır.
Nazirliyin mətbuat xidmətindən AZƏRTAC-a bildirmişlər ki, sentyabrın 23-ü axşamdan 24-ü səhərədək yağan leysan xarakterli yağışlar nəticəsində Böyük Qafqazın Quba-Xaçmaz bölgəsindəki Qudyalçayda suyun səviyyəsi 8, Vəlvələçayda 23 santimetr artmışdır. Araşdırmaya görə, Böyük Qafqazın Quba-Xaçmaz bölgəsi çaylarında sululuq ongünlük normanın 80-200, Kiçik Qafqazın çaylarında 80-150, Lənkəran-Astara bölgəsi çaylarında 20-50, Naxçıvan MR çaylarında isə 75-80 faizini təşkil etmişdir.
Eyni zamanda, sentyabrın 24-də Kür çayının Qıraqkəsəmən məntəqəsində də suyun səviyyəsində 8 santimetr artım qeydə alınmışdır. Qanıx çayının Əyriçay məntəqəsində isə suyun səviyyəsində dəyişiklik müşahidə olunmamışdır.
Kür çayının aşağı axınındakı Surra və Şirvan məntəqələrində suyun səviyyəsinin 2 santimetr azaldığı, Salyanda 3, Bankədə 14, Araz çayının Novruzlu məntəqəsində 7 santimetr artdığı müəyyən edilmişdir.
Bölmənin digər xəbərləri
