“LG Electronics”in əməliyyat mənfəəti üç ayda 10,8 faiz azalıb
Bakı, 25 aprel, AZƏRTAC
Cənubi Koreyanın “LG Electronics” texnoloji şirkəti qlobal iqtisadi qeyri-müəyyənliklər səbəbindən ilin birinci rübündə əməliyyat mənfəətində ikirəqəmli azalmaya məruz qalıb.
AZƏRTAC Sinxua agentliyinə istinadla xəbər verir ki, şirkətin əməliyyat mənfəəti yanvar-mart rübündə əvvəlki ilin müvafiq dövrü ilə müqayisədə 10,8 faiz azalaraq 973,2 milyon dollar təşkil edib. Bununla belə, mənfəət göstəricisi təxminən 922,4 milyon dollar həcmində proqnozlaşdırılan bazar gözləntilərini üstələyib.
Kompaniyanın gəliri 3,3 faiz artaraq 15,3 milyard dollar olub və bu, şirkətin tarixində ən yüksək birinci rüb gəliri kimi qeydə alınıb. Xalis gəlir isə 7,1 faiz artaraq 425,2 milyon dollara çatıb.
Məişət texnikası bölməsi üç ayda 6,2 milyard dollar gəlirlə 682,9 milyon dollar, avtomobil komponentləri biznesi isə 1,9 milyard dollar gəlirlə 37,8 milyon dollar əməliyyat mənfəəti əldə edib. Bu, ötən ilin eyni rübünə nisbətən 11,5 faiz artım deməkdir.
Bölmənin digər xəbərləri
