LİTVA PREZİDENTİ 80 İLLİK YUBİLEYİNİ QEYD EDİR

03.11.2006 [20:24]
Çap et
A⁺ A^-

AZƏRTAC-ın İTAR-TASS-dan aldığı xəbərə görə, Litva Prezidenti Valdas Adamkus noyabrın 3-də doğum gününü qeyd etmişdir. Dövlət başçısı anadan olduğu günü prezident sarayındakı iş otağında səhər tezdən yubileyi münasibətilə onu təbrik etməyə gələn hökumət üzvlərini, ictimai təşkilatların nümayəndələrini qəbul etməklə keçirmişdir.

1949-1996-cı illərdə ABŞ-da yaşayan V.Adamkus İllinoys Texniki Universitetini bitirərək, inşaat mühəndisi ixtisası almış, təbiəti mühafizə üzrə federal idarələrdə yüksək vəzifələrdə çalışmışdır. Sonra Litvaya qayıdaraq ölkənin siyasi həyatına fəal qoşulmuşdur.

O, prezident vəzifəsini ilyarım fasilə ilə 1998-ci ildən yerinə yetirir. Çoxsaylı ictimai rəy sorğuları göstərir ki, Adamkus Litvada ən məşhur siyasi xadimdir. O, milli radioya müsahibəsində demişdir: “Litva yeni azad həyata doğru düzgün, lakin çox ağrılı yolla irəliləyir”.

Prezident NATO, Avropa İttifaqı və ABŞ-a istiqamətlənmiş qərbyönümlü yolu dəstəklədiyini gizlətmir.