Liviyanın qəbilə şeyxlərindən ibarət qrup Qahirədə toplaşıb
Qahirə, 17 iyul, AZƏRTAC
Hazırda silahlı münaqişənin davam etdiyi Liviyanın qəbilə şeyxlərinin iştirakı ilə Qahirədə toplantı keçirilib.
AZƏRTAC Misirin Prezident Administrasiyasının məlumatına istinadla xəbər verir ki, toplantıda atəşkəsə nail olunması və bu ölkənin gələcəyi ilə bağlı məsələlər müzakirə olunub.
Qəbilə liderləri qarşısında çıxış edən Misir Prezidenti Əbdülfəttah əl-Sisi qeyd edib ki, rəsmi Qahirə Liviyada sülhün və sabitliyin bərqərar olması, xalqın həmrəyliyi istiqamətində səylərini davam etdirir. O xatırladıb ki, bu məqsədlə Liviyada sülh planı təqdim edilib və bu sənəd ərəb ölkələrinin mütləq əksəriyyəti, habelə Rusiya, ABŞ və Avropa dövlətləri tərəfindən müsbət qiymətləndirilib. Misirin dövlət başçısı bir daha vurğulayıb ki, münaqişə dinc yolla həllini tapmalıdır.
Benqazidən gələn qəbilə şeyxləri də ölkədə atəşkəsə və sülhə nail olunması istiqamətində Misirin səylərini yüksək qiymətləndiriblər.
Qeyd edək ki, Tripolidə olan və BMT-nin tanıdığı Liviya razılıq hökumətini dəstəkləyən liviyalılar danışıqlarda iştirak etməkdən imtina edirlər. Bunu ötən həftə bəyanatla çıxış edən Rusiyanın Xarici İşlər naziri Sergey Lavrov da söyləyib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
