CƏMİYYƏT
Maarifləndirmə tədbiri: Biz sağlam həyat tərzi seçirik, narkomaniyaya yox deyirik
![](/files/galleryphoto/2023/3/1200x630/17014263333557451896_1200x630.jpg)
![](/files/galleryphoto/2023/3/1200x630/17014263332892757240_1200x630.jpg)
Bakı, 1 dekabr, AZƏRTAC
Masallı Rayon İcra Hakimiyyəti yanında fəaliyyət göstərən Narkomanlığa və narkotik vasitələrin qanunsuz dövriyyəsinə qarşı mübarizə üzrə komissiyası Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən işçi qrupu ilə birgə Masallı Gənclər evində “Biz sağlam həyat tərzi seçirik, narkomaniyaya yox deyirik” mövzusunda maarifləndirmə tədbiri keçirib.
Bu barədə AZƏRTAC-a Dövlət Komissiyasının daimi fəaliyyət göstərən işçi qrupundan verilən məlumata görə, tədbir “Yeniyetmələr və gənclər arasında narkomaniyaya qarşı təbliğat və maarifləndirmə işlərinin genişləndirilməsinə dair 2022-2023-cü illər üçün Tədbirlər Planı”na müvafiq olaraq, sağlam həyat tərzinin təbliği ilə bağlı gənclər və yeniyetmələr arasında maarifləndirmə işinin təşkili məqsədilə təşkil edilib.
Tədbirdə işçi qrupun məsul nümayəndəsi gənclər arasında narkotik vasitələrin istifadəsinin risk amilləri, psixoaktiv maddələrin xüsusiyyətləri və onların sağlamlığa zərərli təsiri, narkomanlığa qarşı mübarizə üsulları barədə geniş danışıb.
Həmçinin tələbələri maraqlandıran suallar ətrafında müzakirələr aparılıb.
Sonda tədbir iştirakçılarına narkomaniya ilə mübarizənin təbliği məqsədilə Dövlət Komissiyasının işçi qrupunun hazırladığı əyani vəsaitlər paylanılıb.