MACARISTAN AZƏRBAYCAN İNCƏSƏNƏTİ İLƏ TANIŞ OLUR
Sərgi ölkəmizin Macarıstandakı səfirliyinin və Azərbaycan Rəssamlar İttifaqının təşəbbüsü ilə keçirilir.
Macarıstanlı sənətsevərlər tanınmış rəssamlarımızdan Fərhad Xəlilov, Rasim Babayev, Mirnadir Zeynalov, Səlhəb Məmmədov, Fuad Salayev, Nazim Bəykişiyev, Altay Sadıqzadə və başqalarının əsərləri ilə tanış olmaq imkanı qazanmışlar.
Respublikamızın Macarıstandakı səfiri Həsən Həsənov sərgini açaraq, zəngin tarixi olan Azərbaycanın nadir və bənzərsiz incəsənətindən, Prezident İlham Əliyevin mədəniyyət sahəsində apardığı siyasətdən danışmış, ölkəmizdə incəsənət və mədəniyyət xadimlərinə diqqət və qayğı göstərildiyini xüsusi vurğulamışdır.
Açılış mərasimində Azərbaycan Rəssamlar İttifaqının sədri Fərhad Xəlilov iştirak etmişdir. O, Macarıstan Təsviri və Tətbiqi Sənət Ustatları İttifaqının sədri Andraş Bitak ilə görüşəcək, təsviri sənət muzeylərində, aparıcı rəsm qalereyalarında olacaqdır.
Mərasimə dəvət edilənlər arasında diplomatik korpusun nümayəndələri, Macarıstanın mədəniyyət və incəsənt xadimləri, iş adamları, aparıcı nəşrlərin jurnalistləri, Azərbaycan diasporunun üzvləri və Budapeştin ali məktəblərində təhsil alan tələbələrimiz də vardır.
Sərgidə nümayiş etdirilən əsərlər böyük maraq doğurmuşdur. Macarıstan jurnalistləri bu hadisəyə dərin maraq göstərərək, bir neçə nüfuzlu nəşrdə sərgi haqqında məlumat vermiş və aparıcı telekanallar xüsusi reportajlar hazırlamışdır.
Sərgi oktyabrın 22-dək davam edəcəkdir.
Bölmənin digər xəbərləri
