Makron İraqda fransız hərbçisinin həlak olduğunu təsdiqləyib
Paris, 13 mart, AZƏRTAC
Fransa Prezidenti Emmanuel Makron İraqın Erbil bölgəsində baş verən hücum nəticəsində fransız hərbçisinin həlak olduğunu elan edib.
AZƏRTAC xəbər verir ki, dövlət başçısı, həmçinin Fransa hərbçiləri arasında bir neçə yaralının olduğunu təsdiqləyib. Həlak olan hərbçi Varcesdə yerləşən 7-ci Alp ovçuları batalyonunun baş çavuşu Arno Friondur.
Prezident X platformasında paylaşdığı mesajda həlak olan hərbçinin ailəsinə və silahdaşlarına millətin bütün sevgisini və həmrəyliyini ifadə edib. O, hücum nəticəsində bir neçə fransız əsgərinin də yaralandığını bildirib və Fransanın zərərçəkənlərin və onların yaxınlarının yanında olduğunu vurğulayıb.
Makron qeyd edib ki, Fransa hərbçilərinə qarşı bu hücum qəbuledilməzdir. Onun sözlərinə görə, Fransa qüvvələri 2015-ci ildən bəri İraqda yalnız terrorizmə qarşı mübarizə çərçivəsində fəaliyyət göstərir. Fransa Prezidenti, həmçinin vurğulayıb ki, İranda gedən müharibə belə hücumlara bəraət qazandıra bilməz.
Bölmənin digər xəbərləri
