“Mançester Siti” və “Real Madrid” Çempionlar Liqasının 1/4 finalına yüksəlib
Bakı, 7 mart, AZƏRTAC
“Mançester Siti” və “Real Madrid” UEFA Çempionlar Liqasının 1/4 finalına vəsiqə qazanıb.
AZƏRTAC xəbər verir ki, futbol üzrə Çempionlar Liqasının 1/8 final mərhələsinin cavab oyununda İspaniyanın “Real Madrid” klubu Almaniyanın “Leypsiq” klubu ilə 1:1 hesablı heç-heçə edib və turnirin 1/4 finalına yüksəlib. Görüş Madriddəki "Santyaqo Bernabeu" stadionunda baş tutub.
“Real Madrid”in heyətində Vinisius (65-ci dəqiqə), “Leypsiq”in heyətində isə Villi Orban fərqlənib (68). İlk oyun “Real Madrid”in 1:0 hesablı qələbəsi ilə başa çatıb.
Çempionlar Liqasının hazırkı qalibi İngiltərənin “Mançester Siti” klubu evdə Danimarka “Kopenhagen”inə 3:1 hesabı ilə qalib gəlib.
Bundan əvvəl Almaniyanın “Bavariya” və Fransanın “Paris Sen-Jermen” klubları Çempionlar Liqasının 1/4 finalına yüksəlib. 1/8 finalın qalan dörd cütlüyünün cavab oyunları martın 12-13-də keçiriləcək.
Bölmənin digər xəbərləri
